بالی وُڈ فلم ’دھوم‘ کے ہدایت کار سنجے گدھوی انتقال کر گئے

مشہور بالی وُڈ فلموں ’دھوم ‘ اور ’دھوم ٹو‘ کے ڈائریکٹر سنجے گدھوی کا دل کا دورہ پڑنے سے انتقال ہو گیا ہے۔

’انڈیا ٹُوڈے‘ کے مطابق فلم ساز سنجے گدھوی کا انتقال اتوار کو ہوا۔

ان کی فلموں ’دھوم‘ اور ’دھوم ٹُو‘ کو بہت زیادہ پذایرائی ملی تھی۔ ان فلموں میں ہریتک روشن اور ابھیشک بچن کی اداکاری نے بھی شائقین کی بھرپور داد وصول کی تھی۔

سنجے گدھوی کی عمر لگ بھگ 57 برس تھی۔ سوگواروں میں ان کی اہلیہ اور دوبیٹیاں ہیں۔
 

سنجے کے دوستوں کے مطابق وہ چند دن قبل فلم دیکھنے سنیما گھر بھی گئے تھے۔

انہوں نے مقبول فلم ’میرے یار کی شادی ہے‘،’کِڈ نیپ‘ اور 2012 میں ’عجب غضب لَوّ‘ اور ’آپریشن پرندے‘ کی ہدایت کاری کی تھی۔

سنجے گدھوی نے ہدایت کاری کے اپنے کریئر کا آغاز سنہ 2000 میں فلم ‘تیرے لیے‘ سے کیا تھا لیکن اس فلم کو زیادہ توجہ نہیں مل سکی تھی۔

ان کو پہلی بار غیرمعمولی توجہ 2004 میں ملی جب ایکشن تھرلر فلم ’دھوم‘ ریلیز ہوئی۔

سنجے گدھوی کی موت پر یش راج فلمز، فلم ساز کنال کوہلی، امیشا پٹیل، جان ابراہام، سلینا جیٹلی سمیت شوبز انڈسٹری وابستہ افراد نے افسوس کا اظہار کیا ہے۔