امارات میں 500 درہم کا نیا نوٹ، ڈیزائن میں خاص کیا؟

امارات کے سینٹرل بینک نے 500 درہم کا نیا کرنسی نوٹ جاری کیا ہے جو کہ پولیمر سے تیار کردہ ہے۔ 

الامارات الیوم کے مطابق نیا نوٹ قومی کرنسی کے تیسرے ایڈیشن کا حصہ ہے۔ 

500 درہم کے نئے نوٹ میں ریاست کی علامتی شخصیات، قابل دید ترقیاتی و ثقافتی و سیاحتی مقامات اور پائیداری کے منفرد نمونے شامل کیے گئے ہیں۔ 

اماراتی سینٹرل بینک کے مطابق جمعرات 30 نومبرسے نیا نوٹ لین دین  کے لیے دستیاب ہو گا۔ 

نئے نوٹ میں ایک جانب ایکسپو دبئی میں ’تیرا’ پویلین کی تصویر ہے جو امارات کے وژن اور پائیدار ترقی میں اس کے بین الاقوامی کردار کو اجاگر کر رہا ہے۔ 

نوٹ کے دوسری جانب دبئی کے فیوچر میوزیم  کی تصویر ہے جو ماضی کو مستقبل سے جوڑنے والے فن تعمیر کا شاہکار ہے۔ 

نوٹ کے عقبی حصے میں اماراتی ٹاورز کی تصویر ہے۔ برج خلیفہ ان میں سے ایک ہے۔ جسے 828 میٹر بلند ہونے کے باعث دنیا کا سب سے اونچا ٹاور مانا جاتا ہے۔ یہ 160 سے زیادہ منزلوں پر مشتمل ہے۔ 

اماراتی سینٹرل بینک نے نوٹ کی تیاری میں پولیمر کا استعمال کیا ہے جو عام مادے سے زیادہ مضبوط اور پائیدار ہے۔