فلم حقیقت بن گئی؟ فائنل ڈیسٹی نیشن کی سکریننگ کے دوران سینما کی چھت گر گئی

اگر آپ نے معروف امریکی ہارر تھرلر فلم ’فائنل ڈییسٹی نیشن‘ دیکھی ہے تو آپ جانتے ہوں گے کہ اس میں کہانی کا آغاز ایک نوجوان کے اچانک خوفناک خواب سے ہوتا ہے، جس میں وہ مستقبل میں ہونے والے ایک ہولناک حادثے کو دیکھتا ہے اور پھر یہ خواب حقیقت بننے لگتا ہے۔

حال ہی میں دنیا بھر میں فائنل ڈیسٹی نیشن فلم فرنچائز کا چھٹا حصہ ’فائنل ڈیسٹینیشن: بلڈ لائنز‘  ریلیز کیا گیا ہے جس کی سکریننگ دنیا بھر کے سینما گھروں میں جاری ہے۔ 

حال ہی میں اس فلم کے آرٹ سے جڑی کہانی کی ہی نقل میں ایک ایسا واقعہ پیش آیا جس میں فلم کی سکریننگ کے دوران سینما کی چھت کا ٹکرا ٹوٹ کر گر پڑا۔ 

ہالی وڈ کی خبریں دینے والی معروف ویب سائٹ ’ڈیڈ لائن‘ کے مطابق یہ واقعہ پچھلے ہفتے ارجنٹینا کے دارالحکومت بیونس آئرس کے علاقے لا پلاٹا میں واقع ’سینما اوچو‘ میں پیش آیا، جسے ارجنٹائن کے ڈیجیٹل خبر رساں ادارے  ’انفوبائے‘ نے رپورٹ کیا۔

19 مئی کو رات 9 بجے فلم کی نمائش ہو رہی تھی جس میں مرکزی کرداروں کو عجیب و غریب حادثات کے ذریعے موت کا سامنا ہوتا ہے۔ تقریباً 40 ناظرین اس وقت ہال میں موجود تھے جب تھیٹر نمبر 4 کی چھت سے ملبہ گرنے لگا۔

29 سالہ فیامہ ویلاورڈے جو اپنی 11 سالہ بیٹی اور ایک دوست کے ساتھ فلم دیکھنے آئی تھیں، نے سپینش زبان میں بتایا ’ایک زوردار آواز آئی۔ شروع میں ہم سمجھے یہ فلم کا حصہ ہے کیونکہ ہم فلم میں اتنے مگن تھے لیکن فوراً بعد چھت کا ایک ٹکڑا آ کر مجھ پر گرا۔‘

انہوں نے بتایا کہ ملبے کے ٹکڑے ان کے کندھے، کمر، گھٹنے اور ٹخنے پر لگے، میرا سر اس لیے بچ گیا کیونکہ میں ہلکا سا بازوؤں کے سہارے جھکی ہوئی تھی۔‘

موقع پر بنائی گئی ویڈیو میں چھت میں ایک بڑا سوراخ اور فرش پر ملبہ دیکھا جا سکتا ہے، جو سینما کی نشستوں کے درمیان بکھرا ہوا ہے۔ ویڈیو میں لوگوں کی ہلچل اور ایک دوسرے سے حیرت میں باتیں کرتے سنا جا سکتا ہے۔ 

مقامی رپورٹس کے مطابق، سینما ہال کی جانب سے اس واقعے پر کوئی بیان جاری نہیں کیا گیا اور فلم بینوں نے قیاس ظاہر کیا ہے کہ شہر میں ہونے والی شدید بارش اس نقصان کا سبب ہو سکتی ہے۔ 

فیامہ ویلاورڈے نے بتایا کہ وہ اس واقعے پر قانونی شکایت درج کروانے کا ارادہ رکھتی ہیں اور اپنے وکیل سے رابطہ کر چکی ہیں، کیونکہ انہیں شدید چوٹوں اور ایکسرے میں سامنے آنے والی ’چوٹ کی وجہ سے لگنے والے زخم‘ کی وجہ سے کئی دن کام سے غیر حاضر رہنا پڑا۔

دوسری جانب اس واقعے کی خبر سوشل میڈیا پر اتنی وائرل ہوئی کہ متعدد اکاؤنٹس سے ایک پرانی تصویر نکال کر اس واقعے سے منسوب کی جانے لگی۔ 

اس وائرل تصویر میں بھی ایک سینما کی چھت کو گرا ہوا دیکھا جا سکتا ہے، لیکن یہ تصویر امریکی ریاست واشنگٹن سے ہے اور فروری 2025 میں ’کیپٹن امریکہ: بریو نیو ورلڈ‘ کی نمائش کے دوران پیش آنے والے چھت گرنے کے حادثے کو دکھاتی ہے۔

تاہم ارجینٹینا میں ہونے والا واقعہ پیش تو آیا ہے مگر اس کی ویڈیوز اور تصاویر مختلف ہیں۔ 

16 مئی کو ریلیز ہونے والی زیک لپوسکی اور ایڈم بی سٹین کی ہدایت کاری میں بننے والی یہ فلم کافی مثبت ریویوز کے ساتھ ریلیز ہوئی اور طویل عرصے سے جاری فرنچائز کی سب سے کامیاب اوپننگ بن چکی ہے۔ اس فرنچائز کا آغاز 25 سال قبل ہوا تھا۔

نیو لائن/وارنر برادرز کی یہ فلم باکس آفس پر بڑی کامیابی حاصل کرنے میں کامیاب رہی جس نے ڈومیسٹک اور بین الاقوامی کمائی سے تقریباً 102 ملین ڈالرز کا عالمی آغاز کیا۔