’یہ ہمارے بیگ اٹھاتا تھا‘، ڈاکٹر نعمان نیاز اور شعیب اختر ایک مرتبہ پھر آمنے سامنے

پاکستان کے سابق فاسٹ بولر و کرکٹ لیجنڈ شعیب اختر اور معروف ٹی وی میزبان ڈاکٹر نعمان نیاز ایک مرتبہ پھر آمنے سامنے آگئے ہیں۔

ڈاکٹر نعمان نیاز نے اپنے متعلق بات کرنے پر شعیب اختر کو قانونی نوٹس بھیج دیا ہے۔

ڈاکٹر نعمان نیاز نے سوشل میڈیا پلیٹ فارم ایکس پر ایک بیان میں کہا کہ ’تین سال تک ٹیلی ویژن چینلز اور ڈیجیٹل میڈیا پلیٹ فارمز پر یکطرفہ اور بدنیتی پر مبنی کردار کشی کی مہم جاری رہی، اس طرح کی کئی بے ضابطگیوں کی مثالیں موجود ہیں، ایسی ہی ایک مثال 25 مئی 2025 کو ’تماشا‘ پر نشر ہونے والے پروگرام ’ڈگ آؤٹ‘ کی قسط 31 میں سامنے آئی ہے جہاں شعیب اختر نے ایک بار پھر حقیقت کے برخلاف توہین آمیز ریمارکس دیے۔‘

ان کا مزید کہنا تھا کہ ’آخرکار خاموشی کو مزید رضامندی نہیں سمجھا جا سکتا تھا۔ قانونی مشاورت کے بعد اب باضابطہ اور دوٹوک انداز میں ایک حد مقرر کر دی گئی ہے، شعیب اختر کو قانونی نوٹس بھیج دیا گیا ہے۔‘

یاد رہے کہ کرکٹ لیجنڈ شعیب اختر کی ایک ویڈیو کچھ دنوں سے سوشل میڈیا پر وائرل ہے۔

اس ویڈیو میں دیکھا جا سکتا ہے کہ شعیب اختر پاکستان ٹیم کے کوچنگ کے نظام اور مینیجمنٹ پر تبصرہ کرتے ہوئے اپنی مثال دیتے ہیں۔ وہ کہتے ہیں کہ ’میرے ٹائم پر مجھے تو پتہ بھی نہیں ہوتا تھا کہ کوچ کون ہے؟ دوسرا ہمیں یہ نہیں پتہ ہوتا تھا کہ مینیجر کون ہے؟‘

وہ اپنی بات آگے بڑھاتے ہوئے مزید کہتے ہیں کہ ’ہمارے ٹائم پر ہمیں یہ پتہ ہوتا تھا کہ ہمارے بیگ کمرے میں پہنچے ہیں کہ نہیں، مینیجر البتہ اس لیے رکھا ہوتا تھا، یہ ڈاکٹر نعمان ہمارے بیگ اٹھاتا تھا، یہ اسی لیے رکھا ہوا تھا نا، ہمارے بیگ اٹھانے کے لیے رکھا ہوا تھا، یہ کمپیوٹر میں کچھ لکھتا رہتا تھا اور اس کا بنیادی کام ہمارے بیگ کمروں تک پہنچانا ہوتا تھا۔‘

یاد رہے کہ اس سے قبل سنہ 2021 میں شعیب اختر اور ڈاکٹر نعمان اعجاز کے درمیان لائیو شو میں تلخی ہو چکی ہے۔