ٹک ٹاکر ثنا یوسف کے قتل کا ملزم گرفتار، ’اعترافِ جرم کر لیا‘

اسلام آباد میں قتل ہونے والی ٹک ٹاکر ثنا یوسف کے قتل کے ملزم کو گرفتار کر لیا گیا ہے۔

منگل کی دوپہر کو وزیر داخلہ محسن نقوی نے ایکس پر پوسٹ میں پولیس اہلکاروں کو شاباش دیتے ہوئے لکھا کہ ’ملزم کو 20 گھنٹے سے بھی کم وقت میں گرفتار کیا گیا۔‘

محسن نقوی کا مزید کہنا تھا کہ ’ملزم کی گرفتاری ایک گھنٹہ قبل ہی عمل میں آئی ہے اور پولیس نے ایک پستول اور مقتولہ کا موبائل بھی برآمد کر لیا ہے۔‘

وزیر داخلہ کے مطابق ’ملزم نے جرم کا اعتراف بھی کر لیا ہے۔‘

اس سے قبل اسلام آباد پولیس کی جانب سے بتایا گیا تھا کہ ملزم کو سی آئی اے ٹیم نے فیصل آباد سے گرفتار کیا ہے اور اس کو اسلام آباد منتقل کیا جا رہا ہے۔

خیال رہے پیر کو شام تقریباً پانچ بجے تھانہ سنبل کی حدود میں واقع سیکٹر جی-13 میں نامعلوم ملزم نے گھر میں گھس کر 17 سالہ ثنا یوسف کو قتل کر دیا تھا۔ 

بعدازاں اسلام آباد پولیس کے ترجمان نے ارد نیوز سے بات چیت کرتے ہوئے بتایا تھا کہ ابتدائی معلومات کے مطابق ٹک ٹاکر کو ان کے گھر کے اندر گولیاں ماری گئیں۔

تھانہ سنبل کے سٹیشن ہاؤس آفیسر (ایس ایچ او) ملک آصف نے اردو نیوز کو بتایا تھا کہ بظاہر ٹک ٹاکر ثنا یوسف کو قتل کرنے والا شخص اس کا جاننے والا معلوم ہوتا ہے کیونکہ وہ مہمان بن کر ان کے گھر آیا تھا۔

واقعے کے بعد مقتولہ کی میت کو پمز ہسپتال منتقل کر دیا گیا تھا اور پولیس نے مقدمہ درج کر کے ملزم کی تلاش شروع کر دی تھی۔

ایک ایسی سی سی ٹی وی فوٹیج بھی سامنے آئی ہے جس میں ملزم کو واردات کے بعد گھر سے نکل کر فرار ہوتے ہوئے دیکھا جا سکتا ہے۔

ثنا یوسف کا تعلق خیبر پختونخوا کے ضلع چترال سے تھا اور وہ اپنے خاندان کے ہمراہ اسلام آباد کے سیکٹر جی 13 میں رہائش پذیر تھیں۔