لائیو: پنجاب میں بارشوں سے 103 ہلاکتیں، حکومتی اداروں کی غفلت نہیں، مریم نواز

اہم نکات:

• حمیرہ اصغر کی موت میں کسی زہریلے مادے کی موجودگی ثابت نہیں ہوئی: پولیس

• مستونگ میں بلوچستان کانسٹیبلری کی گاڑی پر حملہ، ڈی ایس پی اور اہلکار جان سے گئے

• چیئرمین سینیٹ یوسف رضا گیلانی ٹڈاپ کرپشن کیس کے تمام مقدمات سے بری

• مون سون بارشیں معمول سے زیادہ ہونے کی پیشگوئی، پنجاب میں چوتھا سلسلہ 21 جولائی سے

حکومتی اداروں کی غفلت کی وجہ سے کوئی ہلاکت نہیں ہوئی: مریم نواز

وزیراعلیٰ پنجاب مریم نواز شریف نے کہا ہے کہ حالیہ بارشوں کے دوران حکومتی اداروں نے اچھا کام کیا اور ان غفلت یا کوتاہی کی وجہ سے کوئی ہلاکت نہیں ہوئی۔

جمعے کو پی ڈی ایم اے ہیڈ کوارٹر میں خطاب کرتے ہوئے انہوں نے کہا کہ

بروقت تیاری کی وجہ سے بارشوں کے دوران نقصانات سے ممکنہ حد تک بچاؤ ممکن ہوا۔

مریم نواز نے کہا کہ جہاں کئی دنوں تک پانی کھڑارہتا تھا اب وہاں چند گھنٹوں میں پانی کی نکاس مکمل کر لیا گیا۔ ندی نالوں کی بروقت ڈی سیلٹنگ کرنے سے نقصانات سے بچاؤ ممکن ہوا۔

ان کا کہنا تھا کہ چھتیں اور دیواریں گرنے اور دیگر وجوہات سے قیمتی انسانی جانوں کے ضیاع پر بہت حد افسوس ہے۔

واضح رہے کہ نیشنل ڈیزاسٹر مینجمنٹ اتھارٹی (این ڈی ایم اے) کے مطابق 26 جون سے اب تک پاکستان کا سب سے زیادہ آبادی والا صوبہ پنجاب 103 اموات کے ساتھ سب سے زیادہ متاثر ہوا ہے۔

حمیرہ اصغر کی موت میں کسی زہریلے مادے کی موجودگی ثابت نہیں ہوئی: پولیس

جامعہ کراچی کے ایچ ای جے ریسرچ انسٹیٹیوٹ آف کیمسٹری کی جانب سے جاری کردہ تجزیاتی رپورٹ میں انکشاف کیا گیا ہے کہ اداکارہ حمیرہ اصغر کی موت کے حوالے سے جمع کرائے گئے نمونوں میں کسی قسم کے نشہ آور، سکون آور یا زہریلے مادے کے شواہد نہیں ملے۔

ایس ایس پی ساؤتھ مہظور علی کے مطابق پولیس سٹیشن گزری کراچی کی جانب سے رپورٹ کے لیے جمع کرائے گئے بال، پھیپھڑوں اور جگر کے نمونوں پر ٹیسٹ کیا گیا، جس میں یہ نتیجہ اخذ کیا گیا کہ دونوں نمونوں (بال اور اندرونی اعضا) میں کسی قسم کا نشہ آور، سکون آور یا زہریلا مادہ موجود نہیں۔

یہ نمونے پوسٹ مارٹم نمبر 301/2025 کے تحت 08 جولائی 2025 کو جناح ہسپتال کراچی سے جمع کیے گئے تھے۔

مستونگ میں بلوچستان کانسٹیبلری کی گاڑی پر حملہ، ڈی ایس پی اور اہلکار جان سے گئے

بلوچستان کے ضلع مستونگ میں نامعلوم شدت پسندوں نے فائرنگ کرکے پولیس افسر اور ایک سپاہی کو قتل کردیا، جبکہ حملے میں دو اہلکار زخمی بھی ہوئے۔

پولیس حکام کے مطابق واقعہ جمعے کی دوپہر کوئٹہ کراچی شاہراہ پر مستونگ کے علاقے چوتو کے مقام پر پیش آیا۔

ڈی ایس پی مستونگ محمد یونس مگسی نے اردونیوز کو بتایا کہ حملے میں قائمقام ڈی ایس پی عبدالرزاق کی گاڑی کو نشانہ بنایا گیا جو قلات سے کوئٹہ جارہے تھے۔ ان کے ہمراہ بلوچستان کانسٹیبلری کے اہلکاروں سے بھرا ہوا مزدا ٹرک بھی تھا۔

انہوں نے بتایا کہ ’راستے میں دہشت گردوں نے قائمقام ڈی ایس پی عبدالرزاق کی گاڑی پر اندھا دھند فائرنگ کی جس سے عبدالرزاق اور تین اہلکار شدید زخمی ہوگئے، بعد میں ایک زخمی سپاہی موقع پر، جبکہ قائمقام ڈی ایس پی عبدالرزاق مستونگ کے سرکاری ہسپتال پہنچ کر دم توڑ گئے۔‘

لیبیا کی مسلح افواج کے کمانڈر ان چیف کی فلیڈ مارشل عاصم منیر سے ملاقات

لیبیا کی مسلح افواج کے کمانڈر ان چیف لیفٹیننٹ جنرل صدام خلیفہ حفتر نے جنرل ہیڈ کوارٹرز میں فیلڈ مارشل سید عاصم منیر سے ملاقات کی۔

پاکستان آرمی کے شعبہ تعلقات عامہ کے مطابق جمعے کو ہونے والی ملاقات میں باہمی دلچسپی کے امور، علاقائی صورتحال، سکیورٹی چیلنجز اور دفاعی تعاون سے متعلق امور پر تبادلہ خیال کیا گیا۔

دونوں رہنماؤں نے سکیورٹی چیلنجز سے نمٹنے کے لیے دفاعی صنعتی تعاون اور تکنیکی مہارت کے تبادلے پر اتفاق کیا۔

مزید کہا گیا کہ جی ایچ کیو پہنچنے پر لیفٹیننٹ جنرل صدام خلیفہ حفتر کا پرتپاک استقبال کیا گیا جس کے بعد پاک فوج کے چاق و چوبند دستے نے گارڈ آف آنر پیش کیا۔

چیئرمین سینیٹ یوسف رضا گیلانی ٹڈاپ کرپشن کیس کے تمام مقدمات سے بری

کراچی کی احتساب عدالت نے چیئرمین سینیٹ یوسف رضا گیلانی کو ٹریڈ ڈیویلپمنٹ اتھارٹی آف پاکستان (ٹڈاپ) کرپشن کیس کے 14 مقدمات سے بری کر دیا ہے۔

جمعے کو عدالت کے باہر میڈیا سے  گفتگو کرتے ہوئے ان کے وکیل فاروق ایچ نائیک نے کہا کہ عدالت نے انصاف کیا، ان کے خلاف جھوٹا مقدمہ بنایا گیا تھا۔

یوسف رضا گیلانی نے کہا کہ ’میرے علاوہ سب بے گناہ افراد بری ہو گئے ہیں۔ میں نے عدالت سے کہا کہ میرے ایک دوست امین فہیم اب اس دنیا میں نہیں رہے لہذا ان کو بھی اس الزام سے بری کیا جائے تو اس پر اتفاق کیا گیا۔‘

ایف آئی اے نے یوسف رضا گیلانی پر کُل 26 مقدمات درج کیے تھے جس میں سے وہ 12 مقدمات میں پہلے بری ہوچکے تھے اور باقی 14 میں سے اب بری ہوئے ہیں۔

مون سون بارشیں معمول سے زیادہ ہونے کی پیشگوئی، پنجاب میں چوتھا سلسلہ 21 جولائی سے

نیشنل ڈیزاسٹر مینجمنٹ اتھارٹی (این ڈی ایم اے) کے مطابق 26 جون سے اب تک پاکستان کا سب سے زیادہ آبادی والا صوبہ پنجاب 103 اموات کے ساتھ سب سے زیادہ متاثر ہوا ہے، اس کے بعد خیبرپختونخوا (کے پی) میں 38، سندھ میں 20، بلوچستان میں 16 اور آزاد کشمیر میں ایک ہلاکت ہوئی ہے۔

پنجاب ڈیزاسٹر مینجمنٹ اتھارٹی نے کہا ہے کہ رواں سال مون سون بارشیں معمول سے زیادہ ہونے کا امکان ہے جبکہ بارشوں کا چوتھا سلسلہ 21 جولائی سے شروع ہو گا۔

جمعے کو جاری بیان میں پنجاب ڈیزاسٹر مینجمنٹ اتھارٹی (پی ڈی ایم اے) کے ترجمان نے کہا کہ مون سون بارشوں اور گلیشئیر پگھلنے کے باعث دریاؤں میں پانی کے بہاؤ میں اضافہ ہو رہا ہے، دریائے سندھ میں تربیلا اور چشمہ کے مقام پر نچلے درجے کا سیلاب ہے۔ 

انہوں نے کہا کہ کالا باغ کے مقام پر درمیانے درجے کا سیلاب ہے جبکہ دریائے راوی، چناب، جہلم، ستلج اور ڈیرہ غازی خان رودکوہیوں میں پانی کا بہاؤ نارمل سطح پر ہے۔

منگلا ڈیم میں پانی کی سطح 47 فیصد، تربیلا میں 79 فیصد ہے جبکہ ستلج ، بیاس اور راوی پر قائم انڈین ڈیمز میں پانی کی سطح 36 فیصد تک ہے۔

مون سون بارشیں: صوبہ پنجاب میں ریسکیو اور ریلیف سرگرمیاں جاری

پی ڈی ایم کا کہنا ہے کہ گذشتہ روز پوٹھوہار ریجن میں سیلابی پانی میں پھنسے ایک ہزار سے زائد شہریوں کو فوج اور انتظامیہ کہ مدد سے ریسکیو کیا گیا۔

جہلم میں 398 شہریوں کو ریسکیو کیا گیا، چکوال میں سیلابی پانی میں پھنسے 209 شہریوں کو محفوظ مقامات پر منتقل کیا گیا جبکہ چکوال میں 182 افراد کو ضلعی انتظامیہ اور 27 شہریوں کو ہیلی کاپٹر کے ذریعے ریسکیو کیا گیا ۔

راولپنڈی میں ضلعی انتظامیہ نے 450 افراد کو ریسکیو کیا۔ راولپنڈی میں نالہ لئی سے چھ شہریوں کو ہیلی کاپٹر کے ذریعے محفوظ مقامات پر منتقل کیا گیا۔

ڈی جی پی ڈی ایم اے عرفان علی کاٹھیا نے کہا کہ پنجاب و ضلعی انتظامیہ کے ریسپانس کے باعث سیلابی پانی میں پھنسنے سے کوئی جانی نقصان نہیں ہوا۔

پی ڈی ایم اے کا کہنا ہے کہ ممکنہ سیلابی خطرے کے پیشِ نظر ان اضلاع میں انتظامات مکمل ہیں جن کے متاثر ہونے کا خدشہ ہے۔

پاکستان اور چین کی شام پر اسرائیل کے حملوں کی مذمت

پاکستان نے اسرائیل کے شام پر حملوں کی مذمت کرتے ہوئے اور انہیں نہ صرف غیر ذمہ دارانہ قرار دیا ہے بلکہ انہیں بہت خطرناک اور جان بوجھ عدم استحکام کا باعث قرار دیا ہے۔

ریڈیو پاکستان کے مطابق شام کی صورتحال پر اقوام متحدہ کی سلامتی کونسل کی بریفنگ کے دوران بیان دیتے ہوئے اقوام متحدہ میں پاکستان کے مستقل نمائندے عاصم افتخار احمد نے شام کی خودمختاری اور علاقائی سالمیت کی تمام خلاف ورزیوں کو فوری طور پر بند کرنے کا مطالبہ کیا۔

چین کے نائب مستقل مندوب گینگ شوانگ نے اقوام متحدہ کی سلامتی کونسل کے ہنگامی اجلاس میں شام پر اسرائیلی حملوں کی مذمت کرتے ہوئے کہا کہ یہ حملے بین الاقوامی قانون کی خلاف ورزی ہیں اور فوری طور پر بند کیے جائیں۔ انہوں نے شام کی خودمختاری اور علاقائی سالمیت کے احترام پر زور دیا۔

وزیراعلیٰ پنجاب کی پاکستان میں تعینات بنگلہ دیش کے ہائی کمشنر سے ملاقات

وزیراعلیٰ پنجاب مریم نواز شریف سے پاکستان میں تعینات بنگلہ دیش کے ہائی کمشنر اقبال حسین خان نے لاہور میں ملاقات کی ہے۔

جمعے کو پنجاب حکومت کی طرف جاری بیان کے مطابق ملاقات میں دو طرفہ تعاون، باہمی تجارت، صنعت اور زراعت میں تعاون بڑھانے پر اتفاق کیا گیا۔

مریم نواز شریف نے کہا کہ پاکستان اور بنگلہ دیش ایک ہی درخت کی دو شاخیں ہیں ہماری جڑیں مشترکہ تاریخ اور ثقافت میں پیوست ہیں۔

انہوں نے کہا کہ بنگلہ دیشی سرمایہ کاروں کو ون ونڈو بزنس سینٹرز کے ذریعے ہر ممکن سہولت فراہم کی جائے گی۔

وزیراعلیٰ نے کہا کہ پنجاب بنگلہ دیش کی گارمنٹس، مائیکروفنانس اور وویمن کی ورک فورس میں کامیابیوں کو قدر کی نگاہ سے دیکھتا ہے۔