Sorry, you need to enable JavaScript to visit this website.

پاسپورٹس کی عالمی رینکنگ: پاکستانی شہری بغیر ویزہ کتنے ممالک کا سفر کر سکیں گے؟

پاکستان، سعودی عرب، انڈیا اور چین کی درجہ بندی میں بہتری آئی ہے (فوٹو: ہینلے اینڈ پارٹنرز)
دنیا بھر کے ممالک کے پاسپورٹس کی رینکنگ جاری کرنے والے ادارے ’ہینلے اینڈ پارٹنرز‘ نے تازہ رینکنگ جاری کی ہے جس کے مطابق سنگاپور مضبوط ترین پاسپورٹ رکھنے والا دنیا کا واحد ملک ہے جبکہ پاکستان چار درجے ترقی کے بعد 96 ویں جبکہ سعودی عرب پانچ درجے ترقی کے بعد 54 ویں نمبر پر آگیا ہے۔
سنگاپور کے پاسپورٹ کے حامل شہری دنیا کے 193 ممالک میں ویزہ فری انٹری حاصل کر سکتے ہیں۔
اس سے قبل رواں برس جون میں جاری ہونے والی درجہ بندی میں پاکستان کا 100 واں نمبر تھا اور اس کے پاسپورٹ کے حامل شہری 32 ممالک میں ویزہ فری اینٹری حاصل کر سکتے تھے۔
منگل کو جاری ہونے والی تازہ رینکنگ کے مطابق پاکستان چار درجے ترقی کے بعد 96 ویں نمبر پر آگیا ہے تاہم اب بھی پاکستانی شہریوں کو صرف 32 ممالک میں ہی ویزہ فری انٹری کی سہولت میسر ہوگی۔
سعودی عرب پانچ درجے ترقی کرنے کے بعد 59 ویں سے 54 ویں نمبر پر آگیا اور اس کا پاسپورٹ رکھنے والے افراد کو اب دنیا کے 89 ممالک کے بجائے 91 ممالک کا بغیر ویزہ سفر کرنے کی سہولت حاصل ہو گئی ہے۔
نئی رینکنگ میں انڈیا کی درجہ بندی میں بھی پانچ درجے بہتری آئی ہے، انڈیا 82 ویں سے 77 ویں نمبر پر آگیا ہے اور اب اس کے شہری 58 کے بجائے 59 ممالک میں ویزہ فری سفر کر سکیں گے۔
’ہینلے اینڈ پارٹنرز‘ کی رینکنگ میں دوسرا نمبر مشترکہ طور پر جاپان اور جنوبی کوریا کا ہے۔ دونوں ممالک کے پاسپورٹ رکھنے والے شہری دنیا کے 190 ممالک میں ویزے کے بغیر سفر کر سکتے ہیں۔
ڈنمارک، فن لینڈ، فرانس، جرمنی، آئرلینڈ، اٹلی اور سپین تیسرے نمبر پر ہیں اور ان ممالک کا پاسپورٹ رکھنے والے افراد کو پیشگی ویزہ کے بغیر 189 ممالک تک رسائی حاصل ہو سکتی ہے۔

اسی طرح سے روس اور ترکیہ نے تین درجے ترقی کے ساتھ 49 ویں سے 46 واں نمبر حاصل کر لیا ہے. چین 64 ویں سے 60 ویں پر آگیا ہے جبکہ متحدہ عرب امارات کا آٹھواں نمبر پر ہے۔
سنہ 2014 اور 15 میں نمبر ون رہنے والے ممالک امریکہ اور برطانیہ کی عالمی پاسپورٹ رینکنگ میں ایک، ایک درجہ تنزلی ہوئی ہے۔
نئی رینکنگ میں برطانیہ کا چھٹا اور امریکہ 10 ویں نمبر پر ہے۔

دنیا بھر کے پاسپورٹس کی رینکنگ کیسے کی جاتی ہے؟

بین الاقوامی فرم ہینلے اینڈ پارٹنرز دنیا بھر کے پاسپورٹس کی رینکنگ  کرتی ہے جبکہ انٹرنیشنل ایئر ٹرانسپورٹ ایسوسی ایشن (IATA) اس سے متعلق ڈیٹا فراہم کرتی ہے۔
ویب سائٹ ہینلے اینڈ پارٹنرز کے مطابق دی ہینلے اوپن ناس انڈیکس (ایچ او آئی) کے پاس دنیا بھر کے 199 ممالک کے پاسپورٹس کی رینکنگ جاری کرنے کا اختیار ہے۔ ہینلے اور پارٹنرز کی جانب سے پاسپورٹ کو دو طریقوں سے رینک کیا جاتا ہے۔

ویزہ فری ایکسس

اگر کسی ایک ملک کا پاسپورٹ ہولڈر، دوسرے ملک میں بغیر ویزہ حاصل کیے داخل ہو سکتا ہے تو اِس صورت میں ویزہ دینے والے ملک کو ایک سکور دیا جاتا ہے۔

اس صورت حال میں ویزہ آن ارائیول یعنی دوسرے ملک پہنچ کر ویزہ حاصل کرنا، پرمٹ حاصل کرنا اور الیکٹرانک ٹریول اتھارٹی یعنی (ای ٹی اے) کا ویزہ شامل ہے جس میں روانگی سے قبل حکومت سے ویزہ لینا ضروری نہیں ہوتا۔
ایسے ویزے دوسرے ملک کے ویزہ ویور پروگرام کے ماتحت ہوتے ہیں۔

ویزہ ریکوائرمنٹ

اگر دوسرے ملک جانے سے پہلے کسی ملک کے پاسپورٹ ہولڈر کو اُس ملک کی حکومت سے منظور شدہ الیکٹرانک ویزہ (ای ویزہ) درکار ہو تو اس صورت میں ویزہ دینے والے ملک کو صفر سکور دیا جاتا ہے۔
اگر کسی پاسپورٹ ہولڈر کو ویزہ آن ارآئیول سے قبل اُس ملک کی حکومت سے منظوری لینا پڑے تو اس صورت میں بھی ویزہ دینے والے ملک کو صفر سکور دیا جائے گا کیونکہ اس سسٹم کو ویزہ فری تصور نہیں کیا جائے گا۔
اسی طرح ہر ملک کا مجموعی اوپن ناس سکور دوسرے ملک سے اُسے فری ویزہ ملنے کے بعد طے کیا جاتا ہے۔

شیئر: