پاسپورٹ کی نئی عالمی رینکنگ جاری، سعودی پاسپورٹ کی درجہ بندی میں کتنی بہتری آئی؟

دنیا بھر کے ممالک کے پاسپورٹس کی رینکنگ جاری کرنے والے ادارے ’ہینلے اینڈ پارٹنرز‘ نے تازہ رینکنگ جاری کی ہے جس کے مطابق سنگاپور مضبوط ترین پاسپورٹ رکھنے والا دنیا کا واحد ملک ہے جبکہ سعودی عرب پانچ درجے ترقی کے بعد 54ویں نمبر پر آگیا ہے۔

منگل کو جاری ہونے والی درجہ بندی کے مطابق سنگاپور کے پاسپورٹ کے حامل شہری دنیا کے 193 ممالک میں ویزا فری انٹری حاصل کر سکتے ہیں۔

اس سے قبل رواں برس جون میں جاری ہونے والی درجہ بندی میں سعودی عرب کا 59واں درجہ تھا تاہم اب پانچ درجہ ترقی کرکے 54 ویں نمبر پر آگیا ہے اور اس کا پاسپورٹ رکھنے والے افراد کو اب دنیا کے 89 ممالک کے بجائے 91 ممالک کا بغیر ویزہ سفر کرنے کی سہولت حاصل ہو گئی ہے۔

اس سے قبل پاکستان کا 100واں نمبر تھا تاہم تازہ رینکنگ کے مطابق پاکستان چار درجے ترقی کے بعد 96 ویں نمبر پر آگیا ہے جبکہ اب بھی پاکستانی شہریوں کو صرف 32 ممالک میں ہی ویزہ فری انٹری کی سہولت میسر ہوگی۔

نئی رینکنگ میں انڈیا کی درجہ بندی میں بھی پانچ درجے بہتری آئی ہے، انڈیا 82 ویں سے 77 ویں نمبر پر آگیا ہے اور اب اس کے شہری 58 کے بجائے 59 ممالک میں ویزہ فری سفر کر سکیں گے۔

’ہینلے اینڈ پارٹنرز‘ کی رینکنگ میں دوسرا نمبر مشترکہ طور پر جاپان اور جنوبی کوریا کا ہے۔ دونوں ممالک کے پاسپورٹ رکھنے والے شہری دنیا کے 190 ممالک میں ویزے کے بغیر سفر کر سکتے ہیں۔

ڈنمارک، فن لینڈ، فرانس، جرمنی، آئرلینڈ، اٹلی اور سپین تیسرے نمبر پر ہیں اور ان ممالک کا پاسپورٹ رکھنے والے افراد کو پیشگی ویزہ کے بغیر 189 ممالک تک رسائی حاصل ہو سکتی ہے۔

اسی طرح سے روس اور ترکیہ نے تین درجے ترقی کے ساتھ 49 ویں سے 46 واں نمبر حاصل کر لیا ہے. چین 64 ویں سے 60 ویں پر آگیا ہے جبکہ متحدہ عرب امارات کا آٹھواں نمبر پر ہے۔

سنہ 2014 اور 15 میں نمبر ون رہنے والے ممالک امریکہ اور برطانیہ کی عالمی پاسپورٹ رینکنگ میں ایک، ایک درجہ تنزلی ہوئی ہے۔

نئی رینکنگ میں برطانیہ کا چھٹا jbko امریکہ 10 ویں نمبر پر ہے۔

دنیا بھر کے پاسپورٹس کی رینکنگ کیسے کی جاتی ہے؟

بین الاقوامی فرم ہینلے اینڈ پارٹنرز دنیا بھر کے پاسپورٹس کی رینکنگ  کرتی ہے جبکہ انٹرنیشنل ایئر ٹرانسپورٹ ایسوسی ایشن (IATA) اس سے متعلق ڈیٹا فراہم کرتی ہے۔

ویب سائٹ ہینلے اینڈ پارٹنرز کے مطابق دی ہینلے اوپن ناس انڈیکس (ایچ او آئی) کے پاس دنیا بھر کے 199 ممالک کے پاسپورٹس کی رینکنگ جاری کرنے کا اختیار ہے۔ ہینلے اور پارٹنرز کی جانب سے پاسپورٹ کو دو طریقوں سے رینک کیا جاتا ہے۔

ویزہ فری ایکسس

اگر کسی ایک ملک کا پاسپورٹ ہولڈر، دوسرے ملک میں بغیر ویزہ حاصل لیے داخل ہو سکتا ہے تو اِس صورت میں ویزہ دینے والے ملک کو ایک سکور دیا جاتا ہے۔

اس صورت حال میں ویزہ آن ارائیول یعنی دوسرے ملک پہنچ کر ویزہ حاصل کرنا، پرمٹ حاصل کرنا اور الیکٹرانک ٹریول اتھارٹی یعنی (ای ٹی اے) کا ویزہ شامل ہے جس میں روانگی سے قبل حکومت سے ویزہ لینا ضروری نہیں ہوتا۔

ایسے ویزے دوسرے ملک کے ویزہ ویور پروگرام کے ماتحت ہوتے ہیں۔

ویزہ ریکوائرمنٹ

اگر دوسرے ملک جانے سے پہلے کسی ملک کے پاسپورٹ ہولڈر کو اُس ملک کی حکومت سے منظور شدہ الیکٹرانک ویزہ (ای ویزہ) درکار ہو تو اس صورت میں ویزہ دینے والے ملک کو صفر سکور دیا جاتا ہے۔

اگر کسی پاسپورٹ ہولڈر کو ویزہ آن ارآئیول سے قبل اُس ملک کی حکومت سے منظوری لینا پڑے تو اس صورت میں بھی ویزہ دینے والے ملک کو صفر سکور دیا جائے گا کیونکہ اس سسٹم کو ویزہ فری تصور نہیں کیا جائے گا۔

اسی طرح ہر ملک کا مجموعی اوپن ناس سکور دوسرے ملک سے اُسے فری ویزہ ملنے کے بعد طے کیا جاتا ہے۔