وار 2 اور جولی ایل ایل بی تھری سمیت 2025 میں بالی وڈ کی کون سی اہم فلمیں ریلیز ہوں گی؟
وار 2 اور جولی ایل ایل بی تھری سمیت 2025 میں بالی وڈ کی کون سی اہم فلمیں ریلیز ہوں گی؟
جمعہ 1 اگست 2025 19:48
سوشل ڈیسک -اردو نیوز
ٹائیگر شروف کی فلم ’باغی فور‘ رواں برس پانچ ستمبر کو ریلیز کی جائے گی (فائل فوٹو: فلم پوسٹر)
بالی وُڈ فلم انڈسٹری میں رواں برس کئی فلمیں ریلیز ہوئیں، ان میں سے بڑے بجٹ کی کچھ فلمیں فلاپ ہوئیں جبکہ چھوٹے بجٹ پر بننے والی کئی فلمیں بلاک بسٹر رہیں۔
اس سال کے آغاز میں ریلیز ہونے والی بالی وُڈ کے سُپر سٹار سلمان خان کی فلم ’سکندر‘ دو سو کروڑ انڈین روپے کے بڑے بجٹ میں بنائی گئی تھی لیکن باکس آفس پر صرف 177 کروڑ ہی کما سکی۔
دوسری جانب حال ہی میں ریلیز ہونے والی اہان پانڈے اور انیت پاڈا کی ڈیبیو فلم ’سیارہ‘ صرف 35 سے 50 کروڑ کے بجٹ سے بنائی گئی ہے لیکن اس نے ریلیز کے صرف دو ہفتے میں ہی 440 کروڑ انڈین روپے کا بزنس کر لیا ہے۔
اس کے علاوہ ’ریڈ ٹو‘، ’ستارے زمین پر‘، ’چھاوا‘ اور دیگر فلموں نے بھی فلم بینوں میں خوب پذیرائی حاصل کی۔
آئیے آپ کو بتاتے ہیں کچھ ایسی فلموں کے بارے میں جن کی ریلیز ابھی باقی ہے۔
’باغی 4‘
ٹائیگر شروف کے مداحوں کو ان کی آنے والی نئی فلم ’باغی 4‘ کا بے صبری سے انتظار ہے۔
ایکشن، ڈرامہ اور تھرل سے بھرپور اس فلم کو رواں برس ستمبر کی پانچ تاریخ کو ریلیز کیا جائے گا۔
اس فلم کی ہدایت کاری اے ہرش نے کی ہے، تاہم فلم نقادوں کا خیال ہے کہ ’باغی‘ کے سابق چیپٹرز کی طرح اس نئے سیکوئل کو بھی مداح پسند کریں گے۔
’تہران‘
بالی وُڈ کے ایکشن سٹار جان ابراہم کی فلم ’تہران‘ کی آمد بھی قریب ہے۔
ایکشن اور تھرل سے بھرپور اس سنسنی خیز فلم کی ریلیز کی تاریخ کا اعلان کر دیا گیا ہے۔
ارون گوپلان کی ہدایت کاری میں بننے والی یہ فلم روس یوکرین جنگ کے واقعات کے گرد گھومتی ہے اور اسے رواں ماہ کی 14 تاریخ کو ریلیز کیا جائے گا۔
’وار ٹو‘
ریتک روشن، این ٹی راما راؤ جونیئر، کائرہ ایڈوانی اور جان ابراہم کی کاسٹ پر مشتمل فلم ’وار ٹو‘ کی ریلیز بھی رواں ماہ کی 14 تاریخ کو ہوگی۔
ایکشن اور تھرل سے بھرپور یہ فلم سنہ 2019 میں ریلیز ہونے والی فلم ’وار‘ کا سیکوئل ہے۔ اس فلم کی کہانی انڈین فوج کے جاسوسوں اور ان کی کارروائیوں کے گرد گھومتی ہے۔
’جولی ایل ایل بی تھری‘
’جولی ایل ایل بھی تھری‘ ہندی زبان کی کامیڈی فلم ہے جس میں اکشے کمار، ارشد وارثی، ہما قریشی، امریتا راؤ اور سوربھ شُکلا اداکاری کرتے ہوئے نظر آئیں گے۔
’جولی ایل ایل بی تھری‘ کے ہدایت کار اور رائٹر سبھاش کپور ہیں جبکہ اس کے پروڈیسر اکشے کمار، ڈمپل خارباندہ اور نارین کمار ہیں۔
’جولی ایل ایل بی تھری‘ متوقع طور رواں برس ستمبر میں ریلیز کی جائے گی (فائل فوٹو: فلم پوسٹر)
یہ فلم متوقع طور رواں برس ستمبر میں ریلیز کی جائے گی۔
’پارم سُندری‘
’پارم سُندری‘ میں مرکزی کردار سدھارتھ ملہوترا اور جھانوی کپور ادا کر رہے ہیں۔
یہ فلم رومانس اور ڈرامہ سے بھرپور ہوگی جبکہ اس فلم کی کہانی اںڈین معاشرے کی روایتی لوسٹوری کے گرد گھومتی ہے۔
تشار جالوٹا کی ہدایت کاری میں بننے والی یہ فلم ’پارم سندری‘ رواں ماہ میں ہی ریلیز کی جائے گی۔
’دھرندر‘
رنویر سنگھ کے گیٹ اپ کی وجہ سے ریلیز سے قبل ہی سوشل میڈیا پر پذیرائی حاصل کرنے والی ’دھرندر‘ کی ریلیز رواں سال پانچ دسمبر کو ہو گی۔
ڈرامے اور ایکشن سے بھرپور اس فلم کی کہانی جاسوسی کے گرد گھومتی ہے۔
’دھرندر‘ کی کاسٹ میں سنجے دت، ماہادون، ارجن رام پال، اکشے کھنہ، راکیش بیدی، سارہ ارجن اور سورو کھرانہ شامل ہیں۔
