سعودی طالبعلم محمد القاسم کی مسجد الحرام میں نماز جنازہ، مکہ میں تدفین

سعودی طالبعلم محمد القاسم جو گزشتہ جمعے برطانیہ کے شہر کیمبرج میں چاقو کے حملے میں جان سے گئے تھے، مکہ مکرمہ کے الشہدا قبرستان میں سپرد خاک کردیا گیا۔

العربیہ اور الاخباریہ کے مطابق محمد القاسم کی میت کو برطانیہ سے مملکت منتقل کیا گیا، جمعے کو مسجد الحرام میں نماز جنازہ کے بعد تدفین عمل میں آئی۔

یاد رہے کیمبرج کے جنوب میں واقع مل پارک میں 20 سالہ سعودی طالبعلم محمد القاسم  کو چاقو کے وار کرکے قتل کردیا گیا تھا۔

 برطانوی پولیس نے واقعے میں ملوث ہونے کے شبے میں دو افراد کو گرفتار کیا تھا۔

محمد القاسم سعودی شہری اورای ایف انٹرنیشنل لینگویج کیمپس کا طالبعلم تھے جو ایک نجی سکول ہے۔

برطانیہ کی کیمرج کراون کورٹ نے قتل کیس کی پہلی سماعت کے دوران مرکزی ملزم پرعوامی مقام پر قتل اور چاقور رکھنے کی فرد جرم عائد کی تھی، آئندہ  سماعت 8 ستمبر کو ہوگی۔

دوران سماعت ملزم نے الزامات کی صحت سے انکار کیا اور دعوی کیا کہ وہ اپنا دفاع کررہا تھا۔

عرب نیوز کے مطابق محمد القاسم کے قتل کے بعد ایک چیرٹی ادارے کو اب تک 1.8 ملین ریال عطیہ کیے جا چکے ہیں، دی روڈ مساجد کیئر ایسوسی ایشن نے صرف دو دن میں 1.7 ملین ریال کے عطیات جمع کیے، یہ رقم محمد القاسم کی یاد میں مسجد کی تعمیر میں خرچ کی جائے گی۔