ویمنز کرکٹ ورلڈ کپ: پاکستان کے سکواڈ کا اعلان، فاطمہ ثنا کپتانی کریں گی

پاکستان ویمنز کرکٹ کی نیشنل سلیکشن کمیٹی نے آئی سی سی ویمنز کرکٹ ورلڈ کپ 2025 کے لیے 15 رکنی سکواڈ کا اعلان کیا ہے جو 30 ستمبر سے 2 نومبر تک کھیلا جائے گا۔

پاکستان کرکٹ بورڈ (پی سی بی) کے مطابق یہی سکواڈ 16 سے 22 ستمبر تک لاہور کے قذافی سٹیڈیم میں شیڈول تین ون ڈے میچوں کی سیریز میں بھی جنوبی افریقہ کے خلاف حصہ لے گا۔

دائیں ہاتھ کی بیٹر ایمان فاطمہ، جنہوں نے حال ہی میں آئرلینڈ کے خلاف اپنا ٹی20 ڈیبیو کیا، ون ڈے سکواڈ کا حصہ ہوں گی۔ فاطمہ ثناء پہلی بار کسی بڑے ایونٹ میں قومی ٹیم کی قیادت کریں گی۔

23 سالہ ثناء اس سے قبل اس سال لاہور میں کھیلے گئے ورلڈ کپ کوالیفائر میں ٹیم کی کپتان رہی ہیں، جہاں پاکستان نے تمام میچ جیت کر اس سال انڈیا اور سری لنکا میں شیڈول ورلڈ کپ کے لیے کوالیفائی کیا تھا۔

پاکستان اپنے تمام گروپ میچ کولمبو کے آر پریما داسا انٹرنیشنل کرکٹ سٹیڈیم میں کھیلے گا۔ اگر پاکستان 29 اکتوبر کے سیمی فائنل اور 2 نومبر کے فائنل کے لیے کوالیفائی کرتا ہے تو یہ دونوں میچ بھی کولمبو میں ہی ہوں گے۔

مزید یہ کہ چھ کھلاڑی، ناتالیہ پرویز، رمین شمیم، صدف شمس ، صدیہ اقبال، شوال ذوالفقار اور سیدہ عروب شاہ پہلی بار ورلڈ کپ ون ڈے میں شرکت کریں گی۔

اسی طرح 21 سالہ عروب، 20 سالہ شوال اور 20 سالہ ایمان اس سے قبل جنوری 2023 میں جنوبی افریقہ میں کھیلے گئے آئی سی سی ویمنز انڈر 19 ٹی20 ورلڈ کپ کے افتتاحی ایڈیشن میں پاکستان کی نمائندگی کر چکی ہیں۔

اس کے علاوہ کوالیفائر کھیلنے والے 15 رکنی سکواڈ میں دو تبدیلیاں کی گئی ہیں۔ ایمان اور صدف نے گل فیروزہ اور نجیحہ علوی کی جگہ لی ہے، جو پانچ رکنی نان ٹریولنگ ریزروز میں شامل ہیں۔ دیگر ریزروز میں طوبیٰ حسن، امِ ہانی اور وحیدہ اختر شامل ہیں۔

15 رکنی سکواڈ اور پانچ ریزروز 29 اگست بروز جمعہ سے شروع ہونے والے 14 روزہ تربیتی کیمپ میں حصہ لیں گے۔ اس دوران ہیڈ کوچ محمد وسیم کی زیر نگرانی کھلاڑی پریکٹس سیشنز اور 50 اوورز کے پریکٹس میچ کھیلیں گے۔ کیمپ کے حوالے سے مزید تفصیلات بعد میں جاری کی جائیں گی۔

جنوبی افریقہ کی خواتین کرکٹ ٹیم 12 ستمبر کو لاہور پہنچے گی۔

پاکستان ویمنز ٹیم کا 15  رکنی سکواڈ:

فاطمہ ثناء (کپتان)، منیبہ علی صدیقی (نائب کپتان)، علیہ ریاض، ڈیانا بیگ، ایمان فاطمہ، نشارہ سندھو، ناتالیہ پرویز، عمائمہ سہیل، رمین شمیم، صدف شمس، صدیہ اقبال، شوال ذوالفقار، سدرہ امین، سدرہ نواز (وکٹ کیپر) اور سیدہ عروب شاہ

نان ٹریولنگ ریزروز:

گل فیروزہ، نجیحہ علوی، طوبیٰ حسن، امِ ہانی اور وحیدہ اختر