مون سون کے تین روز باقی، بارشیں 18 ستمبر تک ہوں گی، چیئرمین این ڈی ایم اے

پاکستان میں موسمیاتی تبدیلی کے وفاقی وزیر مصدق ملک نے کہا ہے کہ اگلے مون سون کی تیاری ابھی سے شروع کرنا ہو گی۔

جمعرات کو اسلام آباد میں نیشنل ڈیزاسٹر مینجمنٹ اتھارٹی (این ڈی ایم اے) کے چیئرمین لیفٹیننٹ جنرل انعام حیدر ملک کے ہمراہ پریس کانفرنس میں وفاقی وزیر نے کہا کہ موسمیاتی تبدیلی کی وجہ سے دنیا بدل رہی ہے، وزیراعظم نے چیلنجز سے نمٹنے کے لیے موسمیاتی ایمرجنسی نافذ کرنے کا اعلان کیا ہے۔

’پاکستان موسمیاتی تبدیلی سے شدید متاثرہ ملکوں میں شامل ہے، فلاحی ادارے اور نجی تنظیمیں بڑھ چڑھ کر کام کر رہی ہیں۔‘

مصدق ملک نے کہا کہ سیالکوٹ اور نارووال میں بارش سے شدید تباہی ہوئی۔ سندھ میں سیلاب سے نمٹنے کے لیے پیشگی انتظامات کیے ہیں۔ سیلاب اور بارشوں کی وجہ سے 900 افراد ہلاک ہوئے۔

این ڈی ایم اے کے چیئرمین نے اس موقع پر کہا کہ آئندہ 2 سے 3 روز مون سون جاری رہے گا۔16 سے 18 ستمبر کے دوران وسطی پنجاب اور آزاد کشمیر میں بارش کا امکان ہے۔

’اس وقت ہیڈ پنجند اور گدو بیراج پر پانی کا بہاؤ تیز ہے۔ ستلج، راوی اور چناب  کے علاقوں میں صورتحال کنٹرول میں ہے۔‘

ان کا کہنا تھا کہ ریسکیو آپریشنز جاری ہیں۔ پنجاب میں 24 لاکھ افراد کو محفوظ مقام پر منتقل کیا گیا جبکہ سندھ میں ڈیڑھ لاکھ لوگوں کو محفوظ مقام پر منتقل کیا گیا۔

چیئرمین این ڈی ایم اے نے کہا کہ پانی کا بہاؤ کم کرنے کے لیے کچھ علاقوں میں بند توڑے گئے۔

’پنجاب حکومت کو راشن پیکج سمیت 9 ہزار ٹینٹ فراہم کیے گئے ہیں، پنجاب کے لیے 9 ہزار ٹن سے زیادہ راشن فراہم کیا گیا۔‘

انہوں نے کہا کہ ’موسمیاتی چیلنجز سے نمٹنے کے لیے مل کر اقدامات کرنا ہوں گے، درجہ حرارت بڑھنے کی وجہ سے گلیشیئرز تیزی سے پگھل رہے ہیں۔‘