’انڈیا بمقابلہ جون سینا؟‘، میچ بینر پر پاکستان کا لوگو نہ لگانے پر پنجاب کنگز کو تنقید کا سامنا

متحدہ عرب امارات میں9  ستمبر سے ایشیا کپ 2025 کا آغاز ہو چکا ہے اور ایشیا کی آٹھ ٹیمیں ٹورنامنٹ میں حصہ لے رہی ہیں۔

ٹورنامنٹ کا چھوتا میچ آج پاکستان اور عمان کے درمیان کھیلا جائے گا جس سے پاکستان کی کمپین کا آغاز ہوگا۔

رواں سال بھی کرکٹ شائقین انڈیا اور پاکستان کے میچ کے لیے پرجوش ہیں جو اتوار 14 ستمبر کے لیے شیڈول ہے۔

ایشیا کپ سے قبل انڈیا اور پاکستان کے درمیان ہونے والی کشیدگی کے باعث انڈیا کی ٹورنامنٹ میں عدم شرکت پر کئی افواہیں بھی گردش کرتی رہیں جو کہ بعد میں دم توڑ گئیں۔

لیکن یہ کشیدہ صورتحال ٹورنامنٹ کے آغاز میں بھی سوشل میڈیا پر دکھائی دی جب انڈین ٹیم کے کپتان سوریا کمار یادیو کو چیئرمین ایشین کرکٹ کونسل محسن نقوی سے ہاتھ ملاتے دیکھا گیا اور اس پر انہیں تنقید کا سامنا کرنا پڑا۔

گزشتہ روز ایک پوسٹ بھی سوشل میڈیا پر وائرل ہوئی جو انڈین پریمیئر لیگ کی ٹیم پنجاب کنگز کے فیس بک پیج سے کی گئی ہے۔

اس پوسٹ میں 14 ستمبر کو انڈیا پاکستان میچ کا ایک پوسٹر ڈیزائن کیا گیا تھا جس میں انڈیا کا مقابلہ پاکستان سے شیڈول ہے، مگر پوسٹر میں پاکستان ٹیم کا کوئی ذکر یا تصویر ہی شامل نہیں کی گئی۔

دونوں ممالک کے سوشل میڈیا صارفین حیران تھے اور سوال کرتے نظر آئے کہ پاکستان کی ٹیم کا نام کیوں نہیں لیا گیا؟ اور اس کے ساتھ پنجاب کنگز کی ٹرولنگ کا سلسلہ بھی شروع ہو چکا ہے۔

اکثر صارفین یہ تبصرہ کرتے نظر آئے کہ انہوں نے لوگو تو ایسے ہٹایا ہے جیسے کسی کو پتا نہیں ہے کہ کس ٹیم سے انڈیا کا میچ ہونے جا رہا ہے۔

ایک صارف نے کہا کہ کھیل کو سیاست سے نہ جوڑیں۔

کچھ سوشل میڈیا صارفین اس پر مذاق کرتے رہے کہ کچھ نظر نہیں آ رہا کیا انڈیا کا جون سینا سے مقابلہ ہونے جا رہا ہے؟ اس بات کا تعلق جون سینا کے ’یو کانٹ سی میں‘ یعنی ’آپ مجھے نہیں دیکھ سکتے‘ کے نعرے سے ہے۔

جہاں اس پوسٹ کے بارے میں کرکٹ شائقین میں غم و غصہ ہے وہیں پنجاب کنگز نے اپنی فیس بک پوسٹ پر کمنٹس بھی محدود کر دیے ہیں۔