فیلڈ مارشل عاصم منیر کا سیلاب زدہ علاقوں کا دورہ، ’گُڈ گورننس‘ پر زور

آرمی چیف فیلڈ مارشل عاصم منیر نے صوبہ پنجاب کے سیلاب سے متاثرہ علاقوں کا دورہ کیا اور امدادی سرگرمیوں کا جائزہ لیا۔

پاکستان کی فوج کے شعبہ تعلقات عامہ آئی ایس پی آر کی جانب سے سنیچر کو جاری بیان کے مطابق آرمی چیف نے قصور سیکٹر میں سیلابی صورتحال کا جائزہ لیا اور ملتان کی تحصیل جلال پور پیروالا میں قائم ریلیف کیمپس کا بھی دورہ کیا۔

اس موقع پر چیف سیکریٹری پنجاب اور سول انتظامیہ کے دیگر اعلٰی حکام بھی موجود تھے۔

 آرمی چیف کو امدادی سرگرمیوں اور ریسکیو آپریشن کے حوالے سے تفصیلی بریفنگ دی گئی۔

بیان کے مطابق سول انتظامیہ سے بات چیت کرتے ہوئے آرمی چیف فیلڈ مارشل عاصم منیر نے گُڈ گورننس اور عوام پر مبنی ترقی کی اہمیت پر زور دیا۔

آرمی چیف نے اس بات پر بھی زور دیا کہ سیلاب سے ہونے والی تباہ کاریوں سے عوام کو بچانے کے لیے درکار انفراسٹرکچر کی تیاری سمیت تمام ضروری اقدامات کو تیز کیا جائے۔

انہوں نے کہا کہ ریاست ہر سال قیمتی جانوں کا ضیاع اور املاک کا نقصان نہیں برداشت کر سکتی۔

فیلڈ مارشل عاصم منیر نے سیلاب زدہ علاقوں میں درپیش چیلنجز سے نمٹنے کے لیے مربوط سول ملٹری کوششوں کی اہمیت پر بھی زور دیا اور عوامی بہبود کی غرض سے ہونے والے تمام اقدامات کی حمایت کے لیے فوج کے غیر متزلزل عزم کا اعادہ کیا۔

آرمی چیف نے فوج اور سول انتظامیہ کی مدد سے ریسکیو کیے گئے سیلاب متاثرین سے بھی ملاقات کی اور ان کی آباد کاری اور بحالی میں تعاون جاری رکھنے کی یقین دہانی کرائی۔

انہوں نے ریلیف آپریشنز میں مصروف فوجی جوانوں، ریسکیو 1122 کے اہلکاروں اور پولیس حکام سے بھی ملاقات کی۔ آرمی چیف نے انتہائی مشکل حالات میں قوم کی خدمت کے لیے ان کے بلند حوصلے، آپریشنل تیاری اور ثابت قدمی کو سراہا۔

آرمی چیف عاصم منیر نے متاثرہ علاقوں کا فضائی دورہ بھی کیا اور سیلاب سے ہونے والے نقصانات اور امدادی سرگرمیوں کا جائزہ لیا۔