مشرق ڈیجیٹل بینک کا قیام، ’پاکستان کے مالیاتی شعبے کی ترقی میں سنگ میل ثابت ہوگا‘

وزیراعظم شہباز شریف نے کہا ہے کہ مشرق ڈیجیٹل بینک کا قیام پاکستان میں کیش لیس کاروبار اور مالیاتی شعبے کی ترقی اور فروغ میں سنگ میل ثابت ہوگا۔

منگل کو مشرق ڈیجیٹل ریٹیل بینک کی افتتاحی تقریب سے خطاب میں وزیراعظم نے کہا کہ مشرق ڈیجیٹل بینک کا قیام خوش آئند ہے، مشرق بینک کے مالکان کا تعلق متحدہ عرب امارات سے ہے اور وہ ہمیشہ پاکستان کی معاشی اور سماجی ترقی کے خواہاں رہے ہیں۔

وزیراعظم نے کہا کہ پاکستان اور متحدہ عرب امارات کے تعلقات کو مضبوط بنانے میں الغریر خاندان کا اہم کردار ہے۔

انہوں نے مزید کہا کہ ’مشرق بینک کے چیف ایگزیکٹو آفیسر نوجوان ہیں اور پاکستان کی آبادی کا ایک بڑا حصہ بھی نوجوانوں پر مشتمل ہے۔ یہ نوجوان ملک کے لیے ایک بڑا چیلنج اور عظیم موقع ہیں۔‘

وزیراعظم کا کہنا تھا کہ ڈیجیٹلائزیشن کا دور ہے اور ڈیجیٹلائزیشن اور جدید ٹیکنالوجی کے استعمال سے معیشت کو ترقی دی جا سکتی ہے،معیشت کو پیپر لیس بنانا اور اس میں انسانی عمل دخل کم کرنا ہو گا۔

انہوں نے کہا کہ مشرق بینک ایک بڑا بینک ہے اور امید کرتے ہیں کہ پاکستان میں ڈیجیٹل بینک کے قیام سے مالیاتی شعبے میں عوام کو بہترین خدمات کی فراہمی کے حوالے سے بڑی تبدیلی آئے گی۔

اس موقع پر وفاقی وزیر خزانہ محمد اورنگزیب نے کہا کہ وزیراعظم محمد شہباز شریف کی قیادت میں اقتصادی استحکام کے لیے کوشاں ہیں، ترسیلات زر پاکستان کی لائف لائن ہیں، بین الاقوامی ریٹنگ ایجنسیوں نے بھی پاکستان کی بہتر معاشی کارکردگی کی تصدیق کی ہے۔

وزیر خزانہ نے کہا کہ مشرق ڈیجیٹل بینک کی پاکستان کے مالیاتی شعبے میں شمولیت خوش آئند ہے، امید ہے مشرق ڈیجیٹل بینک پاکستان میں عوام کے لیے بہترین خدمات متعارف کرائے گا۔

اس موقع پر مشرق بینک کے چیئرمین عبدالعزیز الغریر نے کہا کہ مشرق بینک پاکستان میں اپنا مالیاتی سفر شروع کر رہا ہے،  ہمیں اس عمل کا حصہ بننے پر فخر ہے۔

’ہم نے پہلے مکمل ڈیجیٹل بینک کے قیام کے لیے پاکستان کا انتخاب کیا ہے، پاکستان جغرافیائی محل وقوع اور کاروباری و مالیاتی سرگرمیوں کے لیے بہتر ماحول کے باعث ڈیجیٹل اکنامک پاور ہاؤس بننے کی صلاحیت رکھتا ہے۔ ہم پاکستان میں بہترین مالیاتی خدمات تک رسائی کو یقینی بنائیں گے۔ ہم صرف پاکستان میں ڈیجیٹل بینک ہی قائم نہیں کر رہے بلکہ اس کی ترقی کے سفر میں شریک ہو رہے ہیں۔‘

مشرق بینک کے چیف ایگزیکٹو آفیسر محمد ہمایوں سجاد نے کہا کہ گزشتہ سال پاکستان میں ڈیجیٹل ادائیگیوں میں 30 فیصد اضافہ ہوا ہے، نوجوان مالیاتی شعبے کا ڈیجیٹل مستقبل ہیں، ڈیجیٹل بینکاری کے فروغ اور سائبر سکیورٹی کے لیے سٹیٹ بینک کے اقدامات قابل تحسین ہیں۔ 

اس موقع پر وزیراعظم شہباز شریف اور چیئرمین مشرق بینک عبدالعزیز الغریر نے پاکستان میں مشرق ڈیجیٹل ریٹیل بینک کا باضابطہ افتتاح کیا۔