’صدر ٹرمپ کے بغیر یہ تاریخی لمحہ نہ دیکھ پاتے‘، مصر سے وزیراعظم کی ٹویٹ

شرم الشیخ امن سربراہی اجلاس اور غزہ کی سنگین صورتحال کے خاتمے کے لیے طے پانے والے امن معاہدے پر دستخط کی تقریب میں شرکت کے لیے وزیراعظم شہباز شریف مصر پہنچ گئے ہیں۔

پاکستان کی وزارت خارجہ کے مطابق وہ یہ دورہ مصری صدر عبدالفتاح السیسی اور امریکی صدر ڈونلڈ ٹرمپ کی دعوت پر کر رہے ہیں جو اس سربراہی اجلاس کی مشترکہ صدارت کریں گے۔

پیر کو مصر پہچنے پر وزیراعظم شہباز شریف نے ایکس پر پوسٹ کیا کہ ’مصری صدر السیسی اور امریکی صدر ٹرمپ جو اس امن سربراہی اجلاس کے شریک میزبان ہیں، کا مشکور ہوں۔‘

انہوں نے مزید لکھا کہ ’صدر ٹرمپ کی شاندار قیادت اور غیر متزلزل عزم کے بغیر ہم یہ تاریخی لمحہ نہ دیکھ پاتے۔ صدر ٹرمپ کی خصوصی توجہ اور جستجو کی بدولت ہی (غزہ میں جاری)  قتل و غارت کو روکنا ممکن ہوا۔‘

انہوں نے کہا کہ ’آج کی تقریب نسل کشی کے ایک باب کے اختتام کی نشان دہی کرتی ہے، عالمی برادری کو یقینی بنانا چاہیے کہ کہیں بھی ایسا دوبارہ نہ ہو۔‘

وزیراعظم نے مزید کہا کہ ’بہادر فلسطینی عوام 1967 سے پہلے کی سرحدوں کے ساتھ ایک آزاد فلسطین جس کا دارالحکومت القدس شریف ہو، میں رہنے کا پورا حق رکھتے ہیں۔‘

نائب وزیرِ اعظم اسحاق ڈار اور دیگر اعلٰی وزراء بھی اس دورے پر وزیراعظم کے ہمراہ ہیں۔

صدر السیسی کے دفتر سے جاری بیان میں کہا گیا ہے کہ مصر کے سیاحتی شہر شرم الشیخ میں ہونے والے اجلاس میں 20 سے زائد ممالک کے رہنما شرکت کریں گے۔

اس اجلاس کا مقصد غزہ کی پٹی میں جنگ کا خاتمہ، مشرق وسطیٰ میں امن و استحکام کی کوششوں کو فروغ دینا، اور علاقائی سلامتی کے ایک نئے دور کا آغاز کرنا ہے۔

شرم الشیخ سربراہی اجلاس اقوام متحدہ کی جنرل اسمبلی کے گزشتہ ماہ ہونے والے اجلاس کے موقع پر شروع ہونے والی سفارتی کوششوں کا نتیجہ ہے۔