سعودی عرب میں پری ونٹر سیزن کا آغاز، ’چراگاہوں اور جنگلات میں کیمپنگ کی اجازت‘

سعودی عرب میں پری ونٹر سیزن کا آغاز ہو گیا ہے جو52 دن جاری رہے گا۔ یہ سیزن موسم خزاں اور موسم سرما کے درمیان تبدیلی کی نشاندہی ہے۔

پری ونٹر سیزن میں درجہ حرارت میں کمی اور بارش کے امکانات بڑھ جاتے ہیں۔

اس موسمیاتی تبدیلی کا رہائشیوں، کسانوں اور ماحولیاتی سیاحت کے شوقین افراد نے خیرمقدم کیا ہے۔

ایس پی اے کے مطابق عسیر ریجن میں زرعی کیلنڈر کے ایک محقق عبداللہ علی آل موسی کا کہنا ہے کہ ’یہ سیزن ہر سال 16 اکتوبر سے شروع ہوتا ہے اور قمری دو مراحل پر مشتمل ہوتا ہے جس میں ہر مرحلہ 26 دن جاری رہتا ہے۔’

انہوں نے مزید کہا کہ ’موسم کی آمد کی علامات میں جزیرہ نما عرب میں نقل مکانی کرنے والے پرندوں کا گزرنا، چھتوں سے شہد اتارنا اور مغربی جیٹ سٹریم کی وجہ سے بادلوں کی مشرق کی طرف منتقلی شامل ہے۔‘

اس دوران دن کے وقت معتدل موسم، ٹھنڈی شامیں اور بارش برسانے والے بادلوں کی تشکیل کا سبب بنتا ہے۔ یہ موسم  کاشتکاری اور آؤٹ ڈور ٹرپس کے لیے مثالی ہے۔

یہ جنگلی حیات کو نئی زندگی دینے اور مملکت کے بیشتر حصوں میں قدرتی ماحولیاتی سائیکل کو متحرک کرنے میں بھی مدد کرتا ہے۔

موسم سرما کے دوران کیمپنگ کے لیے پرمٹ

سعودی نیشنل سینٹر فار ویجیٹیشن کورڈیولپمنٹ اینڈ کمبیٹنگ ڈیزرٹیفیکیشن نے موسم سرما کے حوالے سے کیمپنگ پرمٹ 2025 کا اجرا شروع کر دیا۔

تفریح کے لیے جنگلات اور سبزہ زاروں والے مقامات پر کیمپ لگانے کے لیے پرمٹ کی معلومات سینٹر کی ویب سائٹ پر بھی دستیاب ہیں۔

سعودی خبررساں ایجنسی ایس پی اے کے مطابق سینٹر کی جانب سے جاری نوٹیفیکشن میں کہا گیا کہ مرکز کے زیر انتظام قومی چراگاہیں، جنگلات اور تفریحی علاقوں میں موسم سرما کے دوران تفریح کے لیے جانے والوں کی سہولت کے لیے کیمپنگ پرمٹ جاری کیے جاتے ہیں۔

سبزہ زاروں اور قدرتی مقامات کے تحفظ کےلیے قومی مرکز برائے سبزہ زار کی جانب سے کیمپنگ کے ضوابط مقرر کیے گئے ہیں جن پرعمل کرنا ضروری ہے۔