شاہین شاہ آفریدی کو ون ڈے ٹیم کا کپتان مقرر کر دیا گیا

پاکستان کرکٹ بورڈ (پی سی بی) نے شاہین شاہ آفریدی کو پاکستان کی ون ڈے ٹیم کا کپتان مقرر کر دیا ہے۔

پی سی بی کے پیر کی شب جاری کردہ بیان کے مطابق بائیں ہاتھ کے فاسٹ بولر شاہین شاہ آفریدی جنوبی افریقہ کے خلاف تین میچوں کی ون ڈے انٹرنیشنل سیریز میں پاکستان کی قیادت کریں گے۔‘

یہ سیریز چار سے آٹھ نومبر تک فیصل آباد کے اقبال سٹیڈیم میں کھیلی جائے گی۔

بیان کے مطابق شاہین کا اس سیریز میں ٹیم کی قیادت کے لیے انتخاب اسلام آباد میں پیر کو ہونے والے اجلاس میں کیا گیا۔

اس اجلاس میں وائٹ بال ہیڈ کوچ مائیک ہیسن، ڈائریکٹر ہائی پرفارمنس عاقب جاوید اور سلیکشن کمیٹی کے ارکان نے شرکت کی۔

25 سالہ فاسٹ بولر نے پاکستان کی جانب سے 66 ون ڈے اور 92 ٹی20 میچز کھیلے ہیں جن میں انہوں نے مجموعی طور پر 249 وکٹیں حاصل کیں۔

 32 ٹیسٹ میچز جن میں راولپنڈی کرکٹ سٹیڈیم میں جنوبی افریقہ کے خلاف جاری دوسرا ٹیسٹ شامل نہیں، شاہین نے 120 وکٹیں حاصل کی ہیں۔

شاہین اس سے قبل 2024 میں نیوزی لینڈ کے خلاف ان کے ہوم گراؤنڈ پر پانچ ٹی20 انٹرنیشنل میچوں میں پاکستان کی قیادت کر چکے ہیں۔