فیصل آباد میں 17 برس بعد انٹرنیشنل میچ، پاکستان اور جنوبی افریقہ آج ون ڈے میں مدِمقابل

پاکستان اور جنوبی افریقہ کے درمیان تین میچوں پر مشتمل ون ڈے سیریز کا آغاز آج سے اقبال سٹیڈیم فیصل آباد میں ہو رہا ہے۔

منگل کو فیصل آباد کے اقبال سٹیڈیم میں دونوں ٹیموں کے درمیان ٹاس سہ پہر آڑھائی بجے شیڈول ہے جبکہ میچ کا آغاز تین بجے ہو گا۔

پاکستان اور جنوبی افریقہ کے درمیان تینوں میچ فیصل آباد میں ہی کھیلے جائیں گے تاہم پہلا میچ چار نومبر، دوسرا میچ چھ نومبر جبکہ تیسرا اور آخری میچ آٹھ نومبر کو شیڈول ہے۔

اقبال سٹیڈیم فیصل آباد میں 17 برس بعد انٹرنیشنل کرکٹ کی واپسی ہو رہی ہے۔ یہاں آخری انٹرنیشنل میچ 11 اپریل 2008 کو پاکستان اور بنگلہ دیش کے درمیان کھیلا گیا تھا۔

اس سٹیڈیم میں مجموعی طور پر 16 ون ڈے انٹرنیشنل میچز کھیلے جا چکے ہیں۔

پاکستان نے اس سٹیڈیم میں 12 ون ڈے انٹرنیشنل کھیلے ہیں جن میں سے نو میچز میں فتح حاصل کی جبکہ تین میں اسے شکست کا سامنا کرنا پڑا۔

جنوبی افریقہ کی ٹیم بھی اس سٹیڈیم میں پانچ ون ڈے انٹرنیشنل میچز کھیل چکی ہے جن میں سے دو میں کامیاب رہی جبکہ اور تین میں شکست کھائی۔

اس ون ڈے سیریز سے قبل دونوں ٹیمیں ٹیسٹ اور ٹی20 سیریز بھی کھیل چکی ہیں۔ جنوبی افریقہ اور پاکستان کے درمیان ٹیسٹ سیریز ایک ایک سے برابر رہی جبکہ ٹی20 سیریز میزبان پاکستان نے دو ایک سے اپنے نام کی۔

شاہین شاہ آفریدی پہلی مرتبہ ون ڈے انٹرنیشنل میں پاکستان ٹیم کی قیادت کررہے ہیں۔

شاہین شاہ آفریدی کا کہنا ہے کہ پاکستان ٹیم کی قیادت ان کے لیے اعزاز ہے اور وہ یہ ذمہ داری باخوبی نبھانے کی کوشش کریں گے۔

انہوں نے کہا ہے کہ ’فیصل آباد میں 17 سال بعد انٹرنیشنل کرکٹ کی واپسی خوش آئند ہے اور ہم جنوبی افریقہ کے خلاف اس سیریز میں اچھی کارکردگی کے لیے پرامید ہیں۔ ہم نے ٹی20 سیریز اچھی کھیلی ہے۔‘

شاہین آفریدی کا کہنا تھا کہ ’بحیثیت کھلاڑی ہمارا کام کھیلنا ہے اور جو بھی ذمہ داری دی جاتی ہے اسے نبھانا ہے۔ اس وقت ان کی توجہ ون ڈے پر ہے کہ کس طرح کارکردگی کو بہتر کرنا ہے۔‘

بابراعظم کے بارے میں شاہین آفریدی کا کہنا ہے کہ ’آخری ٹی20 کی اننگز سے یقیناً ان کا اعتماد بڑھا ہوگا اور دو تین اننگز میں ناکامی کی وجہ سے آپ یہ نہیں کہہ سکتے کہ بابراعظم اچھا کھلاڑی نہیں ہے۔‘

ان کا کہنا تھا کہ ’جب بھی سینئر کھلاڑی پرفارم کرتے ہیں ٹیم کامیابی حاصل کرتی ہے۔‘

پاکستان اور جنوبی افریقہ کے درمیان اب تک کُل 87 ون ڈے انٹرنیشنل کھیلے جاچکے ہیں جن میں سے پاکستان نے34 جبکہ جنوبی افریقہ نے 52 میں کامیابی حاصل کی ہے۔

پاکستان کا سکواڈ

شاہین شاہ آفریدی (کپتان)، ابرار احمد، بابراعظم، فہیم اشرف، فیصل اکرم، فخرزمان، حارث رؤف، حسیب اللہ، حسن نواز، حسین طلعت، محمد نواز، محمد رضوان (وکٹ کیپر)، محمد وسیم جونیئر، نسیم شاہ، صائم ایوب اور سلمان علی آغا پاکستان کے سکواڈ میں شامل ہیں۔

جنوبی افریقہ کا سکواڈ

میتھیو بریٹزکے (کپتان)، اوٹنیل بارٹمین، کوربن بوش، ڈیوالڈ بریوس، ناندری برگر، کوئنٹن ڈی کوک، ٹونی ڈی زوزی، ڈونوون فریرا، بیورن فورٹین، جارج لنڈے، لنگی نگیدی، نقابایومزی پیٹر، لہوان-دری پریٹوریئس، سینیتھمبا قشیلے اور لیزاد ولیمز جنوبی افریقہ کے سکواڈ میں شامل ہیں۔