تین میچوں پر مشتمل ٹی20 سیریز کے آخری میچ میں پاکستان نے جنوبی افریقہ کو چار وکٹوں سے شکست دے کر سیریز اپنے نام کر لی ہے۔
سنیچر کو لاہور کے قذافی سٹیڈیم میں پاکستان نے 140 رنز کا ہدف 19 اوورز میں چھ وکٹوں کے نقصان پر حاصل کیا۔
مزید پڑھیں
-
-
دوسرا ٹی20: پاکستان نے جنوبی افریقہ کو نو وکٹوں سے شکست دے دیNode ID: 896637 -
پاکستان کی جانب سے بابر اعظم نے 68 رنز کی شاندار اننگز کھیلی، ان کی اننگز میں نو چوکے شامل تھے۔
پاکستان نے ٹاس جیت کر پہلے بولنگ کا فیصلہ کیا جو درست ثابت ہوا اور جنوبی افریقہ کی ٹیم مقررہ 20 اوورز میں نو وکٹوں کے نقصان پر 139 رنز ہی بنا پائی۔
پاکستان کی اننگز
پاکستان نے ہدف کے تعاقب کا آغاز کیا تو صاحبزادہ فرحان اور صائم ایوب کریز پر اترے۔ پاکستان کو پہلا نقصان آٹھ کے مجموعی سکور پر صائم ایوب کی صورت میں ہوا، وہ دوسرے اوور میں صفر پر آؤٹ ہو گئے۔
اس کے بعد صاحبزادہ فرحان ایک چھکے اور دو چوکوں کی مدد سے 19 رنز بنا کر ساتویں اوور میں آؤٹ ہو ئے۔
پاکستان کی تیسری وکٹ کپتان سلمان علی آغا کی صورت میں گری، وہ 33 رنز بنا کر آؤٹ ہوئے۔
بابر اعظم ایک لمبے عرصے بعد فارم میں نظر آئے، وہ نو چوکوں کی مدد سے 68 رنز بنا کر آؤٹ ہوئے۔
ان کے علاوہ محمد نواز پانچ اور حسن نواز صفر پر آؤٹ ہوئے جبکہ عثمان خان چھ اور فہیم اشرف چار رنز کے ساتھ ناٹ آؤٹ رہے۔
جنوبی افریقہ کی جانب سے کاربن بوش اور لیزاڈ ولیمز نے دو دو جبکہ ڈونوان فریرا اور اینڈائل سمیلان نے ایک ایک وکٹ حاصل کی۔
جنوبی افریقہ کی اننگز
جنوبی افریقہ نے اننگز کا آغاز کیا تو پہلے ہی اوور میں شاہین شاہ آفریدی نے کوئنٹن ڈی کاک اور لوان دری پریٹوریئس کو پویلین بھیج دیا۔
یوں ابتدائی اوور میں ہی بغیر کسی رنز کے جنوبی افریقہ کو ٹاپ آرڈر کے دو کھلاڑیوں کا نقصان اُٹھانا پڑ گیا۔
اس کے بعد ٹو ڈاؤن آنے والے ڈیوالڈ بریوس نے 21 رنز بنا کر آؤٹ ہوئے۔
میتھیو بریٹزکے ایک، کپتان ڈونوان فریرا 29، جارج لنڈے صفر، ریزا ہینڈریکس 34، اینڈائل سمیلان 13، لیزاڈ ولیمز پانچ رنز بنا کر آؤٹ ہوئے جبکہ وٹنیل بارٹمین صفر اور کاربن بوش 30 رنز کے ساتھ ناٹ آؤٹ رہے۔
آخری اوورز میں کاربن بوش کے 30 رنز نے جنوبی افریقہ کو 140 کا ہدف قائم کرنے میں مدد دی۔
پاکستان کی جانب سے شاہین شاہ آفریدی نے تین، فہیم اشرف اور ڈیبیو کرنے والے عثمان طارق نے دو دو جبکہ سلمان مرزا اور محمد نواز نے ایک ایک وکٹ حاصل کی۔
آج کے میچ میں پاکستان کی جانب سے عثمان طارق انٹرنیشنل کرکٹ میں ڈیبیو کیا۔
اس سے قبل راولپنڈی میں کھیلے گئے سیریز کے پہلے میچ میں جنوبی افریقہ نے 55 رنز سے جبکہ جمعے کو لاہور میں کھیلے گئے دوسرے میچ میں پاکستان نے 9 وکٹوں سے کامیابی حاصل کی تھی۔
پاکستان کی پلیئنگ الیون
اس میچ میں پاکستان کی پلیئنگ الیون میں صاحبزادہ فرحان، صائم ایوب، بابر اعظم، سلمان آغا، عثمان خان، حسن نواز، محمد نواز، فہیم اشرف، شاہین شاہ آفریدی، سلمان مرزا اور عثمان طارق شامل تھے۔
جنوبی افریقہ کی پلیئنگ الیون
اس میچ میں جنوبی افریقہ کی پلیئنگ الیون میں کوئنٹن ڈی کاک، ریضا ہینڈریکس، لوان دری پریٹوریئس، ڈیوالڈ بریوس، میتھیو بریٹزکے، ڈونوان فریرا، جارج لنڈے، کاربن بوش، اینڈائل سمیلان، لیزاڈ ولیمزاور اوٹنیل بارٹمین شامل تھے۔
