افغانستان میں زلزلے پر رابطہ عالم اسلامی کی تعزیت

رابطہ عالمِ اسلامی نے افغانستان کے شمالی علاقے میں آنے والے زلزلے کے نتیجے میں ہلاک اور زخمی ہونے والے افراد کے لواحقین اور افغان عوام کے لیے دلی تعزیت اور مخلصانہ ہمدردی کا اظہار کیا ہے۔

سبق ویب سائٹ کے مطابق رابطہ کے جنرل سیکرٹریٹ کی جانب سے جاری تعزیتی بیان میں کہا گیا ہے کہ رابطہ عالم اسلامی کے سیکرٹری جنرل اور مجلسِ علماء المسلمین کے صدر شیخ ڈاکٹر محمد بن عبد الکریم العیسی نے اس المناک سانحے پر متاثرہ خاندانوں اور افغان عوام سے گہرے دکھ اور مکمل یکجہتی کا اظہار کیا ہے۔

انہوں نے یقین دلایا ہے کہ رابطہ، متاثرین کی تکالیف کم کرنے کے لیے اپنی تمام تر صلاحیتیں بروئے کار لانے کے لیے تیار ہے۔

اللہ سبحانہ و تعالیٰ سے دعا کی کہ وہ جاں بحق افراد پر اپنی بے پایاں رحمت نازل فرمائے، انہیں جنت الفردوس میں جگہ عطا کرے اور زخمیوں کو جلد صحتِ کاملہ عطا فرمائے۔