ملائکہ اروڑہ 53 برس کی ہو گئیں، وہ کون سی عادات ہیں جو انہیں فٹ اور متحرک رکھتی ہیں؟

بالی وڈ اداکارہ ملائکہ اروڑا کو فلمی دنیا کی نمایاں فٹنس برقرار رکھنے والی شخصیات میں شمار کیا جاتا ہے۔ اپنی متناسب جسمانی ساخت اور صحت مند طرزِ زندگی کے لیے مشہور ملائکہ 23 اکتوبر 2026 کو 53 برس کی ہو گئیں۔

انڈین نیوز چینل این ڈی ٹی وی کے مطابق وہ یوگا سے لے کر سٹرینتھ ٹریننگ تک وہ جسمانی اور ذہنی صحت کی اہمیت پر مسلسل زور دیتی رہی ہیں۔

برسوں کے دوران ملائکہ نے انٹرویوز اور سوشل میڈیا کے ذریعے اپنی غذا اور فٹنس روٹین کی جھلکیاں شیئر کی ہیں۔ وہ سخت ڈائٹنگ کے بجائے سادہ گھریلو کھانے، متوازن مقدار میں غذا اور منظم طرزِ زندگی کی حامی ہیں۔ نیند، پانی کا مناسب استعمال اور مستقل مزاجی بھی ان کے روزمرہ معمولات کا اہم حصہ ہیں۔

یوگا ان کی فٹنس روٹین کا بنیادی حصہ ہے

ملائکہ کی فٹنس روٹین میں یوگا مرکزی حیثیت رکھتا ہے۔ وہ کئی برسوں سے سوریہ نمسکار، اشٹنگا وِنیاسا یوگا اور مراقبہ کرتی آ رہی ہیں۔

باقاعدگی سے یوگا کرنے سے جسمانی لچک، توازن، طاقت اور جسمانی آگاہی میں اضافہ ہوتا ہے۔ اس کے علاوہ سانس لینے کی صلاحیت بہتر ہوتی ہے اور ذہنی تناؤ کم کرنے میں بھی مدد ملتی ہے۔

سٹرینتھ ٹریننگ سے پٹھے مضبوط ہوتے ہیں

ملائکہ کی ورزش صرف یوگا تک محدود نہیں۔ ان کی فٹنس ویڈیوز میں واکنگ لنجز، ویٹڈ رشن ٹوئسٹس، ماؤنٹین کلائمبرز، مختلف قسم کی کرنچز اور ڈمبل ورزشیں دیکھی جا سکتی ہیں۔

سٹرینتھ ٹریننگ پٹھوں کو مضبوط بنانے، ہڈیوں کی صحت بہتر رکھنے اور روزمرہ جسمانی سرگرمیوں کو آسان بنانے میں مدد دیتی ہے۔ بڑھتی عمر کے ساتھ پٹھوں کی طاقت برقرار رکھنا خاص طور پر اہم ہو جاتا ہے۔

سادہ گھریلو کھانے کو ترجیح

ملائکہ بارہا بتا چکی ہیں کہ وہ سادہ اور گھریلو کھانا پسند کرتی ہیں۔ وہ روایتی انڈین غذا کھانے اور خوراک کی مقدار پر توجہ دینے کی حامی ہیں۔

انہوں نے گھی سے اپنی محبت کا بھی کئی بار ذکر کیا ہے اور اسے اپنی غذا کا لازمی حصہ قرار دیا ہے۔

یہ عادت اس بات کی یاد دہانی ہے کہ صحت مند غذا کے لیے مہنگے اجزا یا پیچیدہ ڈائٹ پلان ضروری نہیں۔ متوازن غذا میں دال، روٹی، چاول، سبزیاں، دہی، پھل اور مناسب پروٹین شامل ہو سکتے ہیں۔

کھانے کی مقدار پر کنٹرول

ملائکہ کا کہنا ہے کہ وہ بڑی پلیٹ کے بجائے چھوٹی کٹوری میں کھانا پسند کرتی ہیں۔ ان کے مطابق اعتدال اور مقدار پر کنٹرول ان کی غذائی عادات کا اہم حصہ ہے۔

اس سے یہ سمجھنے میں مدد ملتی ہے کہ انسان کتنا کھا رہا ہے اور ضرورت سے زیادہ کھانے سے بچ سکتا ہے۔ تاہم اس کا مطلب بھوکا رہنا یا بھوک کو نظر انداز کرنا نہیں۔

انٹرمٹنٹ فاسٹنگ

ملائکہ کے مطابق وہ عموماً دن کا پہلا بڑا کھانا دوپہر کے قریب کھاتی ہیں اور شام تقریباً سات بجے تک کھانے کا سلسلہ ختم کر دیتی ہیں۔

ان کا کہنا ہے کہ وہ اسے صرف ڈائٹنگ نہیں سمجھتیں بلکہ طرزِ زندگی کا حصہ تصور کرتی ہیں۔

اگرچہ انٹرمٹنٹ فاسٹنگ بعض افراد کے لیے فائدہ مند ہو سکتی ہے، تاہم یہ ہر شخص کے لیے موزوں نہیں۔ ذیابیطس، بعض طبی مسائل یا حمل کے دوران کسی بھی قسم کے فاسٹنگ پلان سے پہلے طبی مشورہ ضروری ہے۔

نیند اور پانی کی مناسب مقدار

ملائکہ کے مطابق اچھی نیند اور مناسب مقدار میں پانی پینا صحت مند زندگی کے بنیادی ستون ہیں۔

ان کا کہنا ہے کہ اکثر لوگ نیند کی اہمیت کو کم سمجھتے ہیں، حالانکہ یہ جسمانی بحالی، توجہ، مزاج اور مجموعی صحت کے لیے ضروری ہے۔ اسی طرح پانی جسمانی درجہ حرارت، نظامِ ہضم اور جسمانی کارکردگی کو بہتر رکھنے میں اہم کردار ادا کرتا ہے۔

مستقل مزاجی ہی اصل راز ہے

ملائکہ کی فٹنس سے سب سے اہم سبق یہ ملتا ہے کہ صحت مند عادات کو روزمرہ زندگی کا حصہ بنایا جائے۔

ان کا معمول صرف ورزش تک محدود نہیں بلکہ اس میں متوازن غذا، مناسب نیند، جسمانی سرگرمی اور خود کی دیکھ بھال شامل ہے۔

ملائکہ اروڑا کی فٹنس کا سفر اس بات کی یاد دہانی ہے کہ دیرپا صحت اور فٹنس کسی شارٹ کٹ یا سخت ڈائٹ کا نتیجہ نہیں بلکہ مستقل مزاجی اور متوازن طرزِ زندگی کا حاصل ہوتی ہے۔