پاکستان میں تین ملکی سیریز کے لیے سری لنکا کے 16 رکنی سکواڈ کا اعلان، چریتھ اسالانکا کپتان مقرر

سری لنکا نے راولپنڈی اور لاہور میں ہونے والی تین ملکی ٹی20 سیریز اور پاکستان کے خلاف تین ایک روزہ میچز کی سیریز کے لیے 16 رکنی سکواڈ کا اعلان کردیا ہے۔
فرانسیسی خبر رساں ایجنسی اے ایف پی کے مطابق جمعے کو اعلان کیے گئے سکواڈ کی قیادت چریتھ اسالانکا کریں گے۔ انہیں تین ملکی ٹی20 سیریز اور پاکستان کے خلاف تین ون ڈے میچز کی سیریز کے لیے قیادت کی ذمہ داری سونپی گئی ہے۔

پاکستان میں شیڈول تین ملکی سیریز کا آغاز 17 نومبر سے ہو گا جس میں میزبان پاکستان کے علاوہ سری لنکا اور زمبابوے کی ٹیمیں حصہ لیں گی۔
واضح رہے کہ اس سے قبل پاکستان اور سری لنکا کے ساتھ تیسری ٹیم افغانستان تھی تاہم کشیدہ صورت حال کے باعث افغان کرکٹ بورڈ نے اپنی ٹیم کو بھیجنے سے انکار کردیا۔
ون ڈے سکواڈ
سری لنکا کے ون ڈے سکواڈ میں چریتھ اسالانکا (کپتان)، پتھم نسانکا، لاہرو اڈارا، کمِل مِشرا، کوشل مینڈس، سدیرا سمارا وکرما، کمنڈو مینڈس اور جنتھ لیاناگے شامل ہیں۔
اسی طرح پون رتنائیکے، ونیدو ہسارنگا، مہیش ٹھیکشانا، جیفری وینڈرسے، دشمنتھا چمیرا، اسیتھا فرنینڈو، پرامود مدوشان اور ایشان ملینگا بھی سری لنکا کے ون ڈے سکواڈ میں شامل ہیں۔
ٹی20 سکواڈ
سری لنکا کا ٹی20 سکواڈ ان کھلاڑیوں پر مشتمل ہے۔ چریتھ اسالانکا (کپتان)، )، پتھم نسانکا، کوشل مینڈس، کوشل پریرا، کمِل مِشرا، دسون شناکا، کمنڈو مینڈس، بھنوکا راجا پکشا، جنتھ لیاناگے، ونیدو ہسارنگا، مہیش ٹھیکشانا، دشان ہمانتھا، دشمانتھا چمیرا، نووان تھشارا، اسیتھا فرنینڈو، ایشان ملینگا۔

تین ملکی سیریز کا شیڈول
’تین ملکی ٹی20 سیریز 17 سے 29 نومبر تک پنڈی کرکٹ سٹیڈیم اور قذافی سٹیڈیم لاہور میں کھیلی جائے گی۔‘
پاکستان کرکٹ بورڈ (پی س بی) کے مطابق ’قذافی سٹیڈیم لاہور ایونٹ کے پانچ میچز کی میزبانی کرے گا۔ ہر ٹیم دوسری ٹیم کے ساتھ دو دو میچز کھیلے گی۔‘
پاکستان اور زمبابوے کے درمیان ایونٹ کا افتتاحی میچ 17 نومبر کو پنڈی کرکٹ سٹیڈیم میں کھیلا جائے گا جبکہ 19 نومبر کو اسی میدان میں سری لنکا اور زمبابوے کی ٹیمیں مدِمقابل ہوں گی۔
پاکستان اور سری لنکا کے درمیان پہلا میچ 22 نومبر قذافی سٹیڈیم کھیلا جائے گا جبکہ پاکستان اور زمبابوے کی ٹیمیں اپنے دوسرے میچ میں 23 نومبر کو اسی گراؤنڈ پر آمنے سامنے ہوں گی۔
سری لنکا اور زمبابوے کے درمیان دوسرا میچ 25 نومبر کو جبکہ پاکستان اور سری لنکا کا دوسرا میچ 27 نومبر کو لاہور کے قذافی سٹیڈیم میں ہوگا۔
تین ملکی سیریز کا فائنل میچ 29 نومبر کو قذافی سٹیڈیم لاہور میں کھیلا جائے گا۔