انڈیا کی اسلام آباد دھماکے میں ملوث ہونے کے پاکستان کے الزام کی تردید

انڈیا نے پاکستان کے وزیرِ اعظم محمد شہباز شریف کی جانب سے اسلام آباد کی جی-11 کچہری میں ہونے والے دھماکے میں انڈیا کے ملوث ہونے کے الزام کی تردید کر دی ہے۔

 انڈین وزارت خارجہ کے ترجمان رندھیر جیسوال نے پاکستانی وزیر اعظم کے بیان پر ردعمل دیتے ہوئے کہا کہ نئی دہلی پاکستانی قیادت کی طرف سے عائد کردہ ’بے بنیاد الزامات کی سختی سے تردید کرتا ہے۔‘

خیال رہے کہ پاکستان کے دارالحکومت اسلام آباد کے علاقے جی 10 کچہری میں دھماکے کے بعد وزیرِ اعظم شہباز شریف نے کہا تھا  کہ اس حملے میں ’انڈیا کی پشت پناہی میں سرگرم‘ گروہ ملوث ہیں۔

وزیر اعظم پاکستان کے آفس سے جاری بیان میں کہا گیا تھا کہ ’شہباز شریف نے انڈیا کی پشت پناہی میں سرگرم فتنہ الخوارج اور فتنہ الہندوستان کی جانب سے ہونے والے دہشت گردانہ حملوں کی سخت الفاظ میں مذمت کی۔‘

’افغانستان سے کارروائی کرتے انڈین ایما پر سرگرم فتنہ الخوارج کی جانب سے اس وقت وانا میں معصوم بچوں پر بھی حملہ کیا گیا۔ وقت آگیا ہے کہ دنیا کو انڈیا کی ایسی مذموم سازشوں کی مذمت کرنی چاہیے۔ دونوں حملے خطے میں انڈین ریاستی دہشت گردی کی بدترین مثال ہیں۔‘

رندھیر جیسوال کا کہنا تھا کہ یہ انڈیا کے خلاف ’چھوٹا بیانیہ‘ بنانے کی پاکستان کی ’قابل فہم حکمت عملی‘ ہے تاکہ اپنے ملک میں عوام کا دھیان ’فوج سے متاثرہ‘ آئینی ترمیم اور ’اقتدار پر قبضے‘ سے ہٹایا جا سکے۔

انڈین وزارت خارجہ کے ترجمان نے مزید کہا کہ ’بین الاقوامی برادری حقیقت سے واقف ہے‘ اور وہ پاکستان ’کی مایوس کن چالوں سے گمراہ نہیں ہو گی۔‘