آئندہ حج میں 15 لاکھ عازمین کو ’بلا سامان‘ سفری سہولت فراہم کی جائے گی
گزشتہ برس 43 ممالک کے 10 لاکھ حجاج کو بلا سامان کی سہولت فراہم کی گئی تھی(فوٹو، ایکس)
سعودی ایئرپورٹس ہولڈنگ کمپنی کی جانب سے آئندہ حج میں 15 لاکھ عازمین کو ’بلا سامان‘ سفری سہولت فراہم کرنے کا ارادہ ظاہر کیا ہے۔
اخبار 24 سے گفتگو کرتے ہوئے کمپنی کے ایگزیکٹوڈائریکٹرآپریشنز محمد خیر الدین نے بتایا کہ ایئرپورٹس ہولڈنگ کمپنی کی ہمیشہ یہ کوشش رہی ہے کہ عازمین حج کو بہتر سے بہتر خدمات فراہم کی جائیں جو مملکت کے ویژن 2030 کے اہداف میں شامل ہے۔
ڈائریکٹر آپریشنز محمد خیر الدین نے مزید بتایا کہ گزشتہ برس وزارتِ حج اور ڈیجیٹل ٹریکنگ منصوبے کے اشتراک سے حج 1446 ہجری میں 43 ممالک کے 10 لاکھ سے زائد حجاج کو مملکت کےہوائی اڈوں پر ’بلاسامان سفر‘ کی سہولت فراہم کی گئی تھی ۔
عازمین کی سہولت کو مدنظر رکھتے ہوئے کمپنی کا منصوبہ ہے کہ آئندہ حج میں اس کا دائرہ 15 لاکھ عازمین تک پھیلا دیا جائے تاکہ زیادہ سے زیادہ حجاج کرام اس سے مستفیض ہوں۔
واضح رہے ’بلا سامان سفر‘ عازمین کے لیے مثالی سہولت ہے جس کے ذریعے مختلف ممالک سے آنے والے عازمین کے سامان پر وزارتِ حج اور ڈیجیٹل ٹریکنگ سسٹم کے تعاون سے مکہ مکرمہ اور مدینہ منورہ میں انکی رہائشی عمارتوں کی نشاندہی کر دی جاتی ہے۔
پرواز کے مملکت پہنچتے ہی عازمین کے سامان کو ٹریکنگ سے گزرتے ہوئے گاڑیوں میں لوڈ کردیا جاتا ہے جنہیں انکی مطلوبہ عمارتوں میں پہنچا دیا جاتا ہے۔
بعداز حج کے مرحلے میں بھی عازمین کی رہائشی عمارتوں سے سامان وصول کرنے کے بعد مقررہ فلائٹس میں لوڈ کیا جاتا ہے جس سے حجاج کو سامان اٹھانے اور ساتھ لے جانے کی ضرورت نہیں رہتی اور ان کا سفر آرام سے مکمل ہوجاتا ہے۔
