سہ ملکی سیریز کا پہلا میچ: پاکستان نے زمبابوے کو پانچ وکٹوں سے شکست دے دی

سہ ملکی سیریز کرکٹ سیریز کے افتتاحی میچ میں پاکستان نے زمبابوے کو پانچ وکٹوں سے شکست دے دی۔  

منگل کو سخت سکیورٹی انتظامات میں پنڈی کرکٹ سٹیڈیم میں کھیلے گئے میچ میں پاکستان نے پانچ وکٹوں کے نقصان پر مقررہ ہدف آخری اوور میں حاصل کر کے میچ اپنے نام کیا۔

اس سے قبل زمبابوے کی ٹیم نے مقررہ 20 اوورز میں آٹھ وکٹوں کے نقصان پر پاکستان کو 148 رنز کا ہدف دیا تھا۔ 

ہدف کے تعاقب میں پاکستان کے پانچ کھلاڑی آؤٹ ہوئے۔

پاکستان کی اننگز

پاکستان نے زمبابوے کا 148 رنز کا ہدف 20ویں اوور کی دوسری گیند پر پانچ وکٹوں کے نقصان پر حاصل کیا۔ فخر زمان 44 رنز کے ساتھ نمایاں رہے۔

صائم ایوب نے 22 اور صاحبزادہ فرحان نے 16رنز بنائے۔ بابر اعظم صفر اور کپتان سلمان علی آغا ایک رن بنا کر آؤٹ ہوئے۔

عثمان خان 37 اور محمد نواز 20 رنز بنا کر ناٹ آؤٹ رہے۔

زمبابوے کی جانب سے بریڈ ایونز نے دو کھلاڑیوں کو آؤٹ کیا۔

زمبابوے کی اننگز

زمبابوے کی جانب سے برائن بینیٹ 49 رنز بنا کر نمایاں رہے۔ ان کے علاوہ ٹیڈیوناشے مارومانی 30، برینڈن ٹیلر 14، رائن برل 8، ٹونی مُنیونگا تین، ٹاشنگا موزیکیوا دو ، بریڈ ایونز دو اور ٹینوٹینڈاماپوسا صرف ایک سکور بنا کر آؤٹ ہوئے۔

کپتان سکندر رضا اور رچرڈ نگاروا بالترتیب 34 اور ایک  کے سکور پر ناٹ آؤٹ پویلین لوٹے۔

پاکستان کی جانب سے محمد نواز نے دو کھلاڑیوں کو آؤٹ کیا جبکہ ابرار احمد، سلمان مرزا، صائم ایوب اور شاہین شاہ آفریدی نے ایک ، ایک وکٹ حاصل کی۔

سکیورٹی کے غیرمعمولی انتظامات

اسلام آباد میں خودکش دھماکے کے بعد غیرملکی ٹیموں کی سکیورٹی فوج اور رینجرز کے حوالے کی گئی ہے جبکہ لاہور کے میچ بھی راولپنڈی منتقل کر دیے گئے تھے۔

پیر کو پاکستان ٹی20 کرکٹ ٹیم کے کپتان سلمان علی آغا نے کہا تھا کہ ایک روزہ فارمیٹ میں ٹیم کی کارکردگی کافی بہتر رہی ہے اور اب بھی ٹیم میں کسی بڑی تبدیلی کا ارادہ نہیں۔

پریس کانفرنس میں انہوں نے کہا کہ ’جو حکمتِ عملی گزشتہ میچز میں کامیاب رہی ہے، اسے ہی آگے لے کر چلیں گے۔‘

سلمان آغا کے مطابق ’گزشتہ تین سے چار ماہ سے ٹیم آل راؤنڈرز پر انحصار کر رہی ہے اور محمد نواز اور فہیم اشرف مکمل آل راؤنڈرز کے طور پر دستیاب ہیں جو مکمل چار اوورز بھی کر سکتے ہیں اور بیٹنگ بھی کرتے ہیں، اس لیے انہیں بھرپور استعمال کیا جائے گا۔‘

انہوں نے کہا کہ ’صائم ایوب بھی کافی عرصے سے اچھی بولنگ کر رہے ہیں اور کوشش ہوتی ہے کہ وہ اور میں دونوں بولنگ کریں۔‘

کپتان نے مزید کہا کہ ’نچلے نمبرز پر ٹیم کی کارکردگی بری نہیں، تاہم مڈل آرڈر کو مزید بہتر ہونے کی ضرورت ہے۔‘

ان کا کہنا تھا کہ عبدالصمد کو فنشر کے طور پر استعمال کیا جائے گا جبکہ جن کھلاڑیوں کو موقع نہیں ملا، انہیں ٹرائی سیریز میں کھلایا جائے گا کیونکہ 12 کھلاڑی ایک ساتھ نہیں کھیل سکتے۔‘

سلمان علی آغا نے پنڈی سٹیڈیم کے کراؤڈ کی تعریف کرتے ہوئے کہا کہ ’راولپنڈی کرکٹ سٹیڈیم میں ہمیشہ ہاؤس فل ہوتا ہے اور وہاں کے شائقین ہمیشہ بڑی تعداد میں آتے ہیں۔‘

ٹی20 کرکٹ پر بات کرتے ہوئے انہوں نے کہا کہ ’اس فارمیٹ میں کسی بھی ٹیم کو ہلکا نہیں لیا جا سکتا۔‘

’وائٹ بال سیریز میں ٹیم اچھا مومینٹم حاصل کر چکی ہے اور کوشش یہی ہوگی کہ اسے برقرار رکھا جائے۔ کرکٹ کیریئر میں اتار چڑھاؤ آتے رہتے ہیں لیکن ٹیم مکمل اعتماد کے ساتھ آگے بڑھ رہی ہے۔‘