مضبوط شراکت داری پر مبنی سعودی، امریکی مشترکہ اعلامیہ جاری

ولی عہد و وزیر اعظم شہزادہ محمد بن سلمان بن عبد العزیز آل سعود کے امریکہ کے دورے کے اختتام پر سعودی، امریکی مشترکہ اعلامیہ جاری ہوا ہے۔

سبق ویب سائٹ کے مطابق اعلامیہ کے متن میں کہا گیا ہے کہ خادم الحرمین الشریفین شاہ سلمان بن عبدالعزیز آل سعود کی ہدایت اور امریکی صدر ڈونالڈ ٹرمپ کی دعوت پر، سعودی عرب امریکہ کے درمیان تاریخی تعلقات اور اسٹریٹجک شراکت کو مضبوط بنانے کے مقصد سے ولی عہد و وزیر اعظم شہزادہ محمد بن سلمان بن عبد العزیز آل سعود نے 18 اور 19 نومبر کو امریکہ کا سرکاری دورہ کیا ہے۔

امریکی صدر نے وائٹ ہاؤس میں ولی عہد کا استقبال کیا، جنہوں نے ان تک خادم الحرمین الشریفین کی طرف سے خیر سگالی کا پیغام پہنچایا جبکہ صدر ٹرمپ نے بھی خادم الحرمین الشریفین کے لئے نیک تمناؤں کا اظہار کیا۔

دورے کے دوران سعودی، امریکی سربراہ اجلاس منعقد ہوا جس میں دونوں رہنماؤں نے دیرینہ دوستی اور مضبوط سٹریٹجک شراکت داری کے عزم کی تجدید کی اور مختلف شعبوں میں تعاون کو مزید فروغ دینے کے طریقوں پر تبادلۂ خیال کیا۔

سعودی وفد میں وزیرِ توانائی شہزادہ عبدالعزیز بن سلمان، سفیرِ سعودی عرب شہزادی ریما بنت بندر، وزیرِ خارجہ شہزادہ فیصل بن فرحان، مشیرِ قومی سلامتی ڈاکٹر مساعد العیبان، وزیرِ تجارت ڈاکٹر ماجد القصبی، وزیرِ خزانہ محمد الجدعان اور پی آئی ایف کے گورنر یاسر الرمیان شامل تھے۔

امریکی جانب سے نائب صدر جی ڈی ونس، وزیرِ خارجہ مارکو روبیو، وزیرِ خزانہ اسکَوٹ بَیسَنت، وزیرِ دفاع پیٹ ہیگسیث، وزیرِ تجارت ہاورڈ لوٹنک، وزیرِ توانائی کرس رائٹ، اور وائٹ ہاؤس کی چیف ایڈمنسٹریٹر سوزی وائلز شریک ہوئے۔

ولی عہد شہزادہ محمد بن سلمان نے صدر ٹرمپ کے مئی 2025ء کے دورہ سعودی عرب کے مثبت نتائج کا ذکر کرتے ہوئے اسے دونوں ممالک کے درمیان شراکت داری کو تاریخی سطح تک لے جانے کا سنگِ میل قرار دیا۔

دونوں فریقوں نے علاقائی و عالمی امور، باہمی دلچسپی کے معاملات اور سٹریٹجک شراکت کو بڑھانے کے لئے جاری کوششوں پر جامع تبادلہ خیال کیا۔

اہم معاہدات و شراکتیں

دورے کے دوران، دونوں ممالک نے متعدد تاریخی معاہدوں اور فریم ورک پر دستخط کئے، جن کی تفصیل درج ہے:

• معاہدۂ اسٹریٹجک دفاع

• مصنوعی ذہانت کی سٹریٹجک شراکت

• سول نیو کلیئر توانائی میں تعاون کی بات چیت کے اختتام کا مشترکہ اعلان

• یورینیم، اہم معدنیات اور مستقل میگنیٹس کی سپلائی چین کے تحفظ پر اسٹریٹجک فریم ورک

• سعودی سرمایہ کاری کے فروغ کے لئے سٹریٹجک ورک فریم

• مالی و اقتصادی شراکت داری کا انتظامی ڈھانچہ

• 

• مالیاتی منڈیوں میں تعاون سے متعلق ترتیبات

• امریکی فیڈرل وہیکل سیفٹی اسٹینڈرڈز کی باہمی پہچان

• تعلیم و تربیت کے شعبے میں مفاہمتی یادداشت

صدر ڈونالڈ ٹرمپ اور خاتونِ اول میلانیا ٹرمپ نے ولی عہد کے اعزاز میں سرکاری عشائیہ دیا جس میں اعلیٰ امریکی حکام، کانگریس کے اراکین اور کاروباری رہنماؤں نے شرکت کی۔

ولی عہد شہزادہ محمد بن سلمان اور امریکی صدر ڈونلڈ ٹرمپ نے سعودی، امریکی سرمایہ کاری فورم میں بھی شرکت کی جس میں تقریباً 270 ارب ڈالر مالیت کے معاہدوں اور مفاہمتی یادداشتوں کا اعلان کیا گیا۔

دورے کے دوران ولی عہد نے امریکی ایوانِ نمائندگان کے سپیکر مائیک جونسن سے ملاقات کی اور سینیٹ و ہاؤس کے متعدد رہنماؤں سے بھی گفتگو کی۔

آخر میں ولی عہد شہزادہ محمد بن سلمان نے صدر ٹرمپ کا پرتپاک استقبال اور میزبانی پر شکریہ ادا کیا۔

صدر ٹرمپ نے خادم الحرمین الشریفین شاہ سلمان بن عبد العزیز اور ولی عہد شہزادہ محمد بن سلمان کے لئے صحت و عافیت کی نیک تمناؤں کا اظہار کیا اور سعودی عوام کے لئے مزید ترقی و خوشحالی کی دعا کی۔