دھرمیندر کی آخری فلم کب ریلیز ہو گی اور اس کی کہانی کیا ہے؟

89 برس کی عمر میں انتقال کر جانے والے بالی وُڈ کے مشہور اداکار دھرمیندر کی آخری فلم ’اکیس‘ آئندہ ماہ 25 دسمبر کو کرسمس کے موقعے پر سینما گھروں ریلیز ہو گی۔

دھرمیندر کے وفات کے بعد یہ فلم ان کے چاہنے والوں کے لیے مزید خاص بن گئی ہے کیونکہ یہ آخری موقع ہو گا جب دھرمیندر بڑے پردے پر نظر آئیں گے۔

انڈین میڈیا کے مطابق فلم کی کہانی سنہ 1971 کی جنگ کے نوجوان فوجی ہیرو ارون کھیترپال کی زندگی پر مبنی ہے جنہیں بہادری پر پرم ویر چکر سے نوازا گیا تھا۔ فلم میں دھرمیندر، ارون کے والد ایم ایل کھیترپال کا مضبوط اور جذباتی کردار ادا کر رہے ہیں۔

فلم کے منظرعام پر آنے والے پوسٹر کے ساتھ لکھا گیا جملہ ’باپ بیٹوں کو بڑا کرتے ہیں لیکن لیجنڈز قومیں بناتے ہیں‘ اس فلم کے جذبے اور پیغام کو واضح کرتا ہے۔

فلم میں اگستیہ نندا نے ارون کا کردار نبھایا ہے جبکہ دیگر اداکار بھی اہم کرداروں میں شامل ہیں۔

’اکیس‘ دھرمیندر کی زندگی کی آخری اور یادگار فلم ہو گی جسے ان کے مداح ہمیشہ ایک خوبصورت تحفے کے طور پر یاد رکھیں گے۔

دوسری جانب دھرمیندر کی وفات پر مختلف شخصیات کی جانب سے تعزیت کا اظہار کیا جا رہا ہے۔

انڈیا کے وزیر اعظم نریندر مودی نے دھرمیندر کی وفات پر افسوس کا اظہار کرتے ہوئے کہا ہے کہ ’دھرمیندر جی کا انتقال انڈین سنیما کے ایک عہد کے اختتام کی علامت ہے۔ وہ ایک ممتاز فلمی شخصیت تھے، ایسے بہترین اداکار جنہوں نے اپنے ہر کردار میں خوبصورتی، اثر اور گہرائی پیدا کی۔‘

ایکس پر جاری بیان میں ان کا مزید کہنا تھا کہ’دکھ کی اس گھڑی میں میری دعائیں اور ہمدردی ان کے خاندان، دوستوں اور لاتعداد چاہنے والوں کے ساتھ ہیں۔‘

کمال حسن نے لکھا ’ دھرمیندر جی کے انتقال پر شدید افسوس ہے۔‘

یوراج سنگھ نے لکھا کہ ’ہر گھر کی کوئی نہ کوئی پسندیدہ فلم دھرمیندر کی ہوتی تھی۔ وہ ہماری پرورش اور اںڈین سنیما کے بہترین دور کا حصہ تھے۔ انہوں نے ہر کردار میں طاقت، خوبصورتی اور سچائی بھر دی، اور جہاں بھی گئے پنجاب کی محبت اور گرمجوشی اپنے ساتھ لے کر گئے۔‘

اکشے کمار نے لکھا کہ ’بچپن میں دھرمیندر جی وہ ہیرو تھے جس جیسا بننے کی ہر لڑکا خواہش رکھتا تھا، ہماری انڈسٹری کے اصل ہی مین۔‘