وزیراعظم شہباز شریف بحرین پہنچ گئے، ولی عہد کی جانب سے استقبال

وزیراعظم شہباز شریف اعلیٰ سطح کے وفد کے ہمراہ دو روزہ سرکاری دورے پر بحرین پہنچ گئے ہیں۔

دارالحکومت منامہ آمد پر بحرین کے ولی عہد و وزیراعظم شہزادہ سلمان بن حمد الخلیفہ نے وزیراعظم شہباز شریف کا استقبال کیا۔

وزیراعظم کے دفتر سے بدھ کو جاری بیان کے مطابق شہباز شریف 26 سے 27 نومبر تک بحرین کا سرکاری دورہ کریں گے۔ نائب وزیراعظم و وزیر خارجہ سینیٹر اسحاق ڈار، وفاقی وزراء اور اعلیٰ عہدیدار بھی وفد میں شامل ہیں۔

دورے کے دوران وزیراعظم شہباز شریف بحرین کے فرمانروا شاہ محمد بن عیسیٰ الخلیفہ، ولی عہد و وزیراعظم شہزادہ سلمان بن حمد الخلیفہ اور بحرین کے نائب وزیراعظم شیخ خالد بن عبداللہ الخلیفہ کے ساتھ اعلیٰ سطح کی ملاقاتیں کریں گے۔

وزیراعظم ہاؤس کے مطابق یہ دورہ مملکت بحرین کے ساتھ پاکستان کے دیرینہ خوشگوار تعلقات کی نشاندہی کرتا ہے جس کا مقصد دونوں ممالک کے درمیان نتائج پر مبنی اور تزویراتی شراکت داری کو فروغ دینا ہے۔

’اس دورے سے روایتی طور پر گرمجوشی اور خوشگوار تعلقات کو تقویت ملے گی، شراکت داری کی نئی راہیں متعین ہوں گی اور عوام سے عوام کے روابط کو مضبوط کیا جائے گا جو باہمی طور پر فائدہ مند تعاون میں حصہ ڈالنے کا باعث بنے گا۔‘