وزیر داخلہ کا اسلام آباد ایئرپورٹ کا دورہ، ’ضروری دستاویزات کے حامل کسی مسافر کو نہ روکا جائے‘
پاکستان کے وفاقی وزیر داخلہ محسن نقوی نے اسلام آباد ایئرپورٹ کا دورہ کر کے امیگریشن کے عمل کا جائزہ لیا۔
وزارت داخلہ کی جانب سے سنیچر کو جاری کردہ بیان میں کہا کہ محسن نقوی نے اس موقعے پر بیرون ممالک جانے والے مسافروں سے ملاقاتیں بھی کیں اور ویزا ایجنٹوں کے خلاف کریک ڈاؤن دیا۔
واضح رہے کہ پاکستان میں گزشتہ چند ہفتوں سے بڑی تعداد میں مسافروں نے بیرون ملک روانگی سے روکے جانے اور جہازوں سے آف لوڈ کرنے کی شکایات کی ہیں۔
مسافروں کو سفر سے روکے جانے سے متعلق سوشل میڈیا پر بات چیت بھی ہو رہی ہے۔
وزیر داخلہ محسن نقوی نے کہا کہ ’جعلی دستاویزات یا دیگر ذرائع سے بیرون ممالک جانے والے مسافر ملک کی بدنامی کا باعث بن رہے ہیں۔ یہ سلسلہ کسی قیمت پر جاری رکھنےکی اجازت نہیں دے سکتے۔‘
انہوں نے کہا کہ ’تصدیق شدہ دستاویزات کے بغیر سفر کرنے کی اجازت نہیں دی جا سکتی۔‘
’ایجنٹ مافیا پیسوں کے لالچ میں معصوم لوگوں کے مستقبل سے کھیل رہے ہیں اور ملک کی بدنامی کا باعث بنتے ہیں۔‘
وزیر داخلہ نے مزید کہا کہ ’معصوم افراد کو ملازمت کا جھانسہ دے کر بیرون ممالک بھجوانے والے ایجنٹوں سے کوئی رعایت نہیں ہو گی۔‘
