سعودی بری فورسز کے کمانڈر کی فیلڈ مارشل عاصم منیر سے ملاقات
رائل سعودی بری افواج کے کمانڈر لیفٹیننٹ جنرل فہد بن سعود الجہنی نے بدھ کو جنرل ہیڈکوارٹرز (جی ایچ کیو) راولپنڈی میں چیف آف آرمی سٹاف فیلڈ مارشل عاصم منیر سے ملاقات کی۔
پاکستانی فوج کے شعبہ تعلقات عامہ (آئی ایس پی آر) کی جانب سے جاری کردہ بیان کے مطابق ملاقات میں باہمی دلچسپی کے امور، علاقائی سلامتی کی صورت حال اور دوطرفہ دفاعی تعاون کو مزید فروغ دینے کے امکانات پر تبادلہ خیال کیا گیا۔
دونوں نے پاکستان اور سعودی عرب کی مسلح افواج کے درمیان دیرینہ اور برادرانہ تعلقات کو مزید مضبوط بنانے کے عزم کا اعادہ کیا۔
فیلڈ مارشل عاصم منیر نے پاکستان اور سعودی عرب کے درمیان مضبوط دفاعی تعاون پر اطمینان کا اظہار کرتے ہوئے تربیت، صلاحیت میں اضافہ اور انٹیلی جنس کے تبادلے کے شعبوں میں مسلسل تعاون کی ضرورت پر زور دیا۔
کمانڈر رائل سعودی بری افواج نے پاکستانی فوج کی پیشہ ورانہ صلاحیتوں اور علاقائی امن و استحکام میں پاکستان کے مثبت کردار کو سراہا۔
جی ایچ کیو پہنچنے پر معزز مہمان کو گارڈ آف آنر پیش کیا گیا۔
