وزیراعظم شہباز شریف کا امیرِ قطر سے ٹیلیفونک رابطہ، قومی دن پر مبارک باد دی

وزیراعظم شہباز شریف نے جمعرات کو قطر کے امیر شیخ تمیم بن حمد الثانی سے ٹیلیفونک رابطہ کیا اور انہیں ریاست کے قومی دن پر مبارک باد دی۔
وزیراعظم آفس کے مطابق وزیراعظم نے قطر کے شاہی خاندان اور حکومت کے ساتھ ساتھ قطری عوام کو بھی قومی دن کے موقع پر دِلی مبارک باد پیش کی۔
شہباز شریف نے قطر میں امن، ترقی اور خوش حالی کے لیے نیک خواہشات کا اظہار کیا اور شیخ تمیم بن حمد الثانی کی دُور اندیش قیادت میں قطر کی شاندار کامیابیوں اور عالمی سطح پر اس کی بڑھتی ہوئی اہمیت کی تعریف کی۔ 
انہوں نے دونوں برادر ممالک کے درمیان دیرینہ اور کثیر جہتی دوطرفہ شراکت داری کو مزید مضبوط بنانے کے لیے پاکستان کے عزم کا اعادہ کیا۔
شیخ تمیم بن حمد الثانی کے ساتھ گفتگو میں وزیراعظم نے غزہ میں قیام امن کی کوششوں میں قطر کے قابل قدر کردار کو بھی سراہا۔ 
انہوں نے پاکستان اور افغانستان کے درمیان کشیدگی کو کم کرنے کے لیے قطر کی جانب سے مذاکرات میں سہولت کاری کی بھی تعریف کی۔ 
دوحہ کے اپنے سرکاری دوروں کا ذکر کرتے ہوئے وزیراعظم شہباز شریف نے امیر قطر کو مناسب تاریخ پر پاکستان کا سرکاری دورہ کرنے کے لیے اپنی جانب سے دی گئی دعوت کا اعادہ کیا۔
 امیر قطر نے قومی دن کے موقع پر مبارک باد دینے پر وزیراعظم  کا شکریہ ادا کیا اور آنے والے دنوں میں دونوں ممالک کے درمیان تاریخی، گہرے، برادرانہ تعلقات کو مزید مضبوط کرنے کے لیے اپنے عزم کا اظہار کیا۔