’پانچ ماہ سے تنخواہ نہیں، یہ جہاز نہیں اڑے گا‘، پائلٹ کا اُڑان بھرنے سے انکار

میکسیکو میں ایک پائلٹ نے عین پرواز کے وقت جہاز اڑانے سے انکار کر دیا اور اپنے کمپنی سے واجبات کی ادائیگی کا مطالبہ کر دیا۔

خبر رساں ادارے اے ایف پی کے مطابق یہ واقعہ میکسیکو سٹی میں پیش آیا اور اس سے جڑی ایک ویڈیو بھی سوشل میڈیا پر وائرل ہے۔

مقامی میڈیا کے مطابق پائلٹ نے جہاز میں سوار درجنوں مسافروں کو مخاطب کرتے ہوئے کہا کہ ’یہ جہاز اس وقت تک اڑان نہیں بھرے گا جب تک ہمارے ساتھ طے کیے گئے واجبات ادا نہیں کیے جاتے۔‘

تاہم اے ایف پی سوشل میڈیا پر وائرل اس ویڈیو کی آزادانہ طور پر تصدیق نہیں کر سکی ہے۔

پائلٹ کا کہنا تھا کہ ان کی پانچ ماہ کی تنخواہ اور سفری اخراجات کمپنی کے ذمے واجب الاداء ہیں۔

پائلٹ نے مسافروں کو بتایا کہ وہ تین بچوں کا والد ہے۔

انہوں نے مزید کہا کہ ’مجھے اس وقت آپ کے لیے برا محسوس ہو رہا ہے کیونکہ آپ اس کے مستحق نہیں ہیں۔ میں قریباً تین برس سے ایئر لائن کے ساتھ ہوں اور میں کبھی بھی پرواز مکمل کرنے میں ناکام نہیں ہوا۔‘

میکسیکو سٹی کے بینیٹو جواریز انٹرنیشنل ایئرپورٹ کے عہدے داروں نے ایکس پر پوسٹ میں کہا کہ شہری ہوابازی کے حکام جنوب مشرقی میکسیکو میں کیریبین ریزورٹ شہر کینکن کے لیے طے شدہ پرواز پر سہ پہر 3:00 بجے پیش آنے والے ایک ’واقعے‘ کی تحقیقات کر رہے ہیں۔

میکسیکو کی میڈیا رپورٹس کے مطابق پائلٹ کو حراست میں لے لیا گیا جب کہ مسافروں کو جہاز سے نکال لیا گیا۔