جنوبی افریقہ میں فائرنگ سے 10 افراد ہلاک، ’گلیوں میں عام شہریوں کو نشانہ بنایا‘

جنوبی افریقہ میں فائرنگ کے واقعے میں کم سے کم 10 افراد ہلاک اور 10 زخمی ہو گئے ہیں۔

فرانسیسی خبر رساں ادارے اے ایف پی کے مطابق پولیس کا کہنا ہے کہ اتوار کو صبح کے وقت جونانسبرگ کے علاقے بیکرسڈیل میں نامعلوم مسلح افراد نے اچانک فائرنگ شروع کر دی۔

رپورٹ کے مطابق یہ جنوب مغربی حصے میں واقع ہے اور شہر سے تقریباً 40 کلومیٹر کی مسافت پر ہے۔

پولیس اہلکاروں نے اے ایف پی کو بتایا کہ ابھی تک فائرنگ کا محرک معلوم نہیں ہو سکا ہے۔

واقعے کے بعد  پولیس کی جانب سے جاری کیے گئے بیان میں کہا گیا ہے کہ ’مسلح افراد نے گلیوں میں چلنے والے عام افراد کو اندھادھند فائرنگ کی۔‘

ابھی تک کوئی گرفتاری عمل میں نہیں آئی ہے، تاہم حکام کا کہنا ہے کہ پولیس پوری طرح سے متحرک ہے اور حملہ آوروں کی تلاش شروع کر دی گئی ہے اور شواہد اکٹھے کیے جا رہے ہیں۔

امریکی ٹی وی سی این این کے مطابق پولیس کے بیان میں حملہ آوروں کی تعداد 12 بتائی گئی ہے۔

’حملہ آور دو گاڑیوں میں پہنچے اور اترتے ہی لوگوں کو گولیوں کا نشانہ بنانا شروع کر دیا جبکہ بعدازاں فرار ہونے میں کامیاب ہو گئے۔‘

پولیس کی جانب سے عینی شاہدین سے کہا گیا کہ وہ سامنے آئیں اور حملہ آوروں کے بارے میں زیادہ سے زیادہ معلومات دیں۔

جنوبی افریقہ میں اس سے قبل بھی فائرنگ کے واقعات ہوتے رہے ہیں جو ایک بڑی معیشت ہے اور وہاں قتل کے واقعات کی شرح بہت بلند ہے۔

پچھلے برس ملک میں قتل کی شرح 20 سال کی بلند ترین رہی اور ہر 20 منٹ میں قتل کا ایک واقعہ رونما ہوا۔