عمران خان کی آنکھوں کا معائنہ ایک سپیشلائزڈ میڈیکل سینٹر میں ہو گا: وزیر اطلاعات عطا تارڑ

پاکستان تحریک انصاف (پی ٹی آئی) کے بانی عمران خان کی صحت سے متعلق تشویش اور اپوزیشن رہنماؤں کے احتجاجی دھرنے کے باعث وفاقی دارالحکومت میں سیاسی درجہ حرارت میں اضافہ ہو گیا ہے۔

ایک طرف جہاں پی ٹی آئی اور دیگر اپوزیشن جماعتیں ’تحریک تحفظِ آئین پاکستان‘ کے پلیٹ فارم سے احتجاج کر رہی ہیں، وہیں دوسری طرف عمران خان کی اپنے بیٹوں سے طویل عرصے بعد ٹیلی فون پر بات چیت بھی کروائی گئی ہے۔

وفاقی وزیر اطلاعات عطا اللہ تارڑ نے سنیچر کو عمران خان کی صحت کے حوالے سے حکومتی موقف بیان کرتے ہوئے کہا ہے کہ ’عمران خان کی آنکھوں کے جاری علاج کے سلسلے میں ان کا مزید معائنہ اور علاج ماہرینِ چشم کے ذریعے ایک سپشلائزڈ طبی مرکز میں کیا جائے گا۔‘

عطا اللہ تارڑ کا مزید کہنا تھا کہ ’اس حوالے سے ایک تفصیلی رپورٹ سپریم کورٹ میں بھی جمع کرائی جائے گی۔ گزارش ہے کہ اس معاملے پر قیاس آرائیوں، مفروضوں اور اسے ذاتی مفادات کے لیے سیاسی رنگ دینے یا سیاسی فائدہ اٹھانے کی کوششوں سے گریز کیا جائے۔‘

علیمہ خان کا موقف اور خدشات

دوسری جانب عمران خان کی بہن علیمہ خان نے سوشل میڈیا پلیٹ فارم ’ایکس‘ پر ایک پوسٹ کے ذریعے تصدیق کی کہ عدالتی احکامات کی روشنی میں سابق وزیراعظم کی ان کے بیٹوں سے بات کروائی گئی ہے۔

علیمہ خان نے لکھا ’چیف جسٹس آف پاکستان نے ہدایت دی تھی کہ عمران خان کو ان کے بیٹوں سے بات کرنے کی اجازت دی جائے۔ ہم اس بات کی تصدیق کر سکتے ہیں کہ ان کی اپنے بیٹوں سے قریباً 20 منٹ تک بات چیت ہوئی ہے۔‘

ان کے مطابق ’عمران خان کے بیٹوں نے بتایا کہ ایک طویل عرصے کے بعد اپنے والد کی آواز سن کر وہ بے حد خوش تھے۔‘ تاہم انہوں نے عمران خان کی بینائی کے حوالے سے خدشات کا اظہار کرتے ہوئے کہ کہ ’اب ہمیں شفاء انٹرنیشنل ہسپتال اسلام آباد میں ان کے ذاتی ڈاکٹروں کی زیرِ نگرانی ان کے فوری طبی علاج کا انتظار ہے، جہاں ماہر ڈاکٹروں کو ان کی بینائی کی بحالی کے لیے ہر ممکن کوشش کرنی چاہیے۔‘

’بروقت علاج فراہم کرنے میں دانستہ تاخیر کی وجہ سے ان کی بینائی کو پہلے ہی نقصان پہنچ چکا ہے۔ ہم مزید کسی بھی تاخیر کو ہرگز برداشت نہیں کریں گے اور بینائی کے مستقل ضیاع کو روکنے کے لیے فوری طور پر ماہرانہ طبی امداد ضروری ہے۔‘

پارلیمنٹ کے باہر دھرنا اور ’محصور‘ رہنما

اسلام آباد میں صورتحال اس وقت کشیدہ ہوئی جب جمعرات کو اپوزیشن لیڈر محمود خان اچکزئی نے عمران خان کو ہسپتال منتقل کرنے کے مطالبے کے ساتھ پارلیمنٹ کے باہر احتجاج کی کال دی۔

اس کے بعد پولیس نے پارلیمنٹ لاجز، خیبر پختونخوا ہاؤس اور پارلیمنٹ ہاؤس جانے والے راستوں کو بند کر دیا جس کے نتیجے میں پی ٹی آئی رہنماؤں نے وہیں دھرنا دے دیا۔

’تحریک تحفظ آئین پاکستان‘ کے ترجمان اخونزادہ حسین احمد یوسفزئی نے اردو نیوز کے نامہ نگار ثوبان افتخار راجہ کو بتایا کہ وہ درجنوں افراد کے ہمراہ پارلیمنٹ ہاؤس میں محصور ہیں اور ان تک کھانا، پانی اور ادویات نہیں پہنچنے دی جا رہیں۔

 سابق رکنِ پارلیمنٹ مصطفیٰ نواز کھوکھر نے بھی احتجاجی رہنماؤں کے لیے کھانا پہنچانے کی کوشش کی تاہم انہیں ریڈ زون میں داخلے سے روک دیا گیا جسے انہوں نے ’انتہائی بے حسی‘ قرار دیا۔

عوام پاکستان پارٹی کی احتجاج میں شمولیت

اس احتجاج میں اب سابق وزیراعظم شاہد خاقان عباسی کی جماعت ’عوام پاکستان پارٹی‘ نے بھی شمولیت کا اعلان کر دیا ہے۔

پارٹی کے ترجمان ڈاکٹر ظفر مرزا نے پارلیمنٹ ہاؤس پہنچنے کے بعد میڈیا کو بتایا کہ ریڈ زون کو ’جیل‘ میں تبدیل کر دیا گیا ہے لیکن وہ آئین کی بالادستی کے لیے اپنا پرامن احتجاج جاری رکھیں گے۔

عمران خان کی صحت اور بینائی کا معاملہ اس وقت عدالتِ عظمیٰ اور عوامی احتجاج دونوں جگہوں پر زیرِ بحث ہے جبکہ حکومت کا کہنا ہے کہ وہ طبی معاملات کو قواعد کے مطابق دیکھ رہی ہے۔