برٹش ایئرویز نے جون تک مشرقِ وسطیٰ کے چند رُوٹس کی پروازیں منسوخ کر دیں

برٹش ایئرویز نے کہا ہے کہ اس نے مشرقِ وسطیٰ کے کئی مقامات کے لیے اپنی پروازیں جون تک منسوخ کر دی ہیں، کیونکہ خطے میں جاری جنگ عالمی ہوا بازی کی صنعت کو متاثر کر رہی ہے۔

ایئرلائن نے منگل کے روز اے ایف پی کو جاری ایک بیان میں کہا کہ اس نے عمان، بحرین، دبئی اور تل ابیب کے لیے 31 مئی تک پروازیں منسوخ کر دی ہیں۔

دوحہ کے لیے پروازیں بھی 30 اپریل تک معطل کر دی گئی ہیں، جبکہ 31 مئی تک محدود شیڈول کے تحت کچھ پروازیں چلائی جائیں گی۔

ایئرلائن نے بیان میں کہا کہ 'مشرقِ وسطیٰ کی صورتحال میں مسلسل غیر یقینی اور فضائی حدود کی غیر مستحکم حالت کے باعث... ہم نے خطے میں اپنی پروازوں کے شیڈول میں عارضی کمی کو بڑھا دیا ہے۔'

سعودی عرب کے شہروں ریاض اور جدہ کے لیے پروازیں جاری رہیں گی، جبکہ ابوظبی کے لیے پروازیں پہلے سے اعلان کے مطابق 25 اکتوبر سے دوبارہ شروع ہوں گی۔

مشرقِ وسطیٰ میں جنگ کے اثرات کے باعث عالمی ایئرلائنز متاثر ہوئی ہیں، کیونکہ ایندھن کی قیمتیں بڑھ رہی ہیں اور مسافر اپنے سفری منصوبوں پر نظرثانی کر رہے ہیں۔

اگرچہ خطے کی ایئرلائنز جیسے قطر ایئرویز، ایمریٹس اور اتحاد سب سے زیادہ متاثر ہوئی ہیں، تاہم بیشتر بڑی بین الاقوامی ایئرلائنز بھی اس سے متاثر ہوئی ہیں، کیونکہ وہ خلیجی خطے کے لیے اور اس کے ذریعے پروازیں چلاتی ہیں۔