جازان سمیت مختلف ریجنز میں عید کی تیاریاں، پبلک مقامات کی تزئین و آرئش
جازان میونسپلٹی اور اس کے زیرِ انتظام دیگر میونسپلٹیز نے عید الفطر کی تیاریاں مکمل کر لی ہیں۔ یہ تیاریاں مختلف خدمات پر مشتمل ہیں تاکہ شہری اور سیاح عید کے موقع پر خوشگوار اور محفوظ ماحول سے لطف اندوز ہو سکیں۔
سعودی پریس ایجنسی ایس پی اے کے مطابق تیاریوں میں تقریبات کے لیے 26 مقامات، نماز کے مقامات اور پارک، سجاوٹی مجسمے، مبارک بادی کے بینرز اور وزیٹرز کے لیے 50 ہزار تحائف شامل ہیں۔
میونسپلٹی بازاروں اور دکانوں کی انسپیکشن بھی کر رہی ہے، ساتھ ہی پبلک مقامات کی تیاری، سجاوٹی روشنیوں کا اضافہ اور پھول لگانے کے ذریعے شہری منظرنامے کو بہتر بنایا گیا ہے۔
دیگر ریجنز میں بھی میونسپلیٹیز کی جانب سے عید کی تیاریاں جاری ہیں۔
الباحہ میونسپلیٹی نے الباحہ ریجن اور اس کے گورنریٹس میں پارکوں اور پبلک گارڈنز کی تیاری مکمل کر لی ہے۔
الباحہ ریجن کے میئر ڈاکٹر علی السواط نے کہا ہے کہ ریجن میں تیار کیے جانے والے پارکوں اور پبلک گارڈنز کی مجموعی تعداد 120 ہوگئی ہے۔
ان کا کہنا تھا کہ یہ سب عید کے دنوں میں گھومنے پھرنے کے لیے آنے والے افراد کی میزبانی کے لیے تیار ہیں۔
