ایران کے فضائی حملے ناکام بنا دیے: بحرین

بحرین کی فوج نے منگل کے روز کہا ہے کہ اس نے ایران کی جانب سے کیے گئے متعدد فضائی حملوں کو ناکام بنا دیا۔

خبر رساں ادارے اے ایف پی کے مطابق یہ حملے امریکہ اور ایران کے درمیان دوبارہ شروع ہونے والی کشیدگی کے تقریباً دو ہفتے بعد کیے گئے، جس کے دوران خلیجی ریاست بحرین پر روزانہ حملوں کا سلسلہ جاری ہے۔

بحرین کی دفاعی فورس نے سوشل میڈیا پلیٹ فارم ایکس  پر جاری ایک بیان میں کہا کہ ’بحرین کے دفاعی فورس کے فضائی دفاعی نظام نے ایران کی جانب سے کیے گئے متعدد فضائی حملوں کو روک کر تباہ کر دیا۔‘

دوسری جانب ایران کے پاسدارانِ انقلاب نے دعویٰ کیا ہے کہ اس نے بحرین اور کویت میں امریکی فوجی اہداف، جن میں فضائی دفاعی نظام بھی شامل ہیں، کو نشانہ بنایا ہے۔

پاسدارانِ انقلاب کے مطابق بحرین میں امریکی فوج کے دو مختلف اڈوں پر دو فضائی دفاعی نظام اور ایک ریڈار تنصیب کو نشانہ بنایا گیا، جبکہ کویت میں میزائل دفاعی نظام، ریڈار اور سیٹلائٹ وصولی کے نظام پر بھی حملے کیے گئے۔

ارنا کے مطابق پاسدارانِ انقلاب نے اپنے بیان میں کہا کہ ’اس ریڈار نگرانی کے بعد دشمن کو ڈرون اور میزائل حملوں کی مزید فیصلہ کن اور طاقتور لہروں کے لیے تیار رہنا چاہیے۔‘

یہ بیان ایسے وقت میں سامنے آیا جب امریکہ نے اعلان کیا کہ اس نے رات بھر جاری کارروائیوں میں ایران کے فوجی کمانڈ مراکز، فضائی دفاعی نظام اور میزائل لانچنگ مقامات کو نشانہ بنایا ہے۔

ایرانی فوج نے بھی دعویٰ کیا ہے کہ اس نے خودکش ڈرونز کے ذریعے کویت میں امریکہ کے تین بڑے فوجی اڈوں کو نشانہ بنایا۔

ایرانی سرکاری ٹیلی وژن آئی آر آئی بی  کے مطابق حملوں میں کیمپ عریفجان کی انتظامی عمارتوں اور سمت معلوم کرنے والے اینٹینوں، کیمپ العدیری میں ہیلی کاپٹروں کی پارکنگ، اور احمد الجابر ایئر بیس میں فوجیوں کی رہائشی عمارت کو نشانہ بنایا گیا۔

اردن کی سرکاری خبر رساں ایجنسی پیٹرا کے مطابق اردن کی فوج نے بھی منگل کے روز اعلان کیا کہ اس نے ایران کی جانب سے اردن کی طرف بھیجے گئے پانچ ڈرونز کو راستے میں ہی تباہ کر دیا۔