امریکی میڈیا نے کہا ہے کہ صدر ڈونلڈ ٹرمپ نے ایران جنگ کے خاتمے کے لیے پیش کی گئی تجاویز کی متعدد شرائط کو تبدیل کر دیا ہے جبکہ فریقین اب بھی حتمی معاہدے سے کافی دور دکھائی دے رہے ہیں۔
فرانسیسی خبر رساں ادارے اے ایف پی نے اخبار نیویارک ٹائمز کا حوالہ دیتے ہوئے بتایا ہے کہ صدر ٹرمپ کی جانب سے کی گئی تبدیلیوں میں معاہدے کی شرائط کو مزید سخت بھی بنایا گیا ہے۔
رپورٹ کے مطابق ان حکام جو صدر ٹرمپ کے اس عمل سے واقفیت رکھتے ہیں، کا کہنا ہے کہ شرائط میں تبددیلی کے بعد نیا مسودہ دوبارہ ایران کو بھجوا دیا گیا ہے۔
رپورٹ میں فوری طور پر یہ وضاحت نہیں ہو سکی ہے کہ ان تبدیلیوں کی نوعیت کیا ہے اور ان میں کیا شامل اور کیا نکالا گیا ہے، تاہم نیوز ویب سائٹ ایکسیوس کے مطابق صدر ٹرمپ کے اقدام کا مقصد معاہدے کے ان متعدد نکات کو مضبوط بنانا ہے جن کو وہ بہت اہم سمجھتے ہیں جیسا کہ یہ نکتہ کے ایران کے جوہری مواد کے ساتھ کیا کیا جائے گا۔
شرائط میں کی گئی تبدیلیوں کے باعث فریقین کے اس معاہدے تک پہنچنے میں مزید وقت لگ سکتا ہے جس سے یہ فیصلہ ہو گا کہ 28 فروری سے شروع ہونے والی جنگ ختم ہو پائے گی یا نہیں۔
امریکہ کے ذرائع نے اے ایف پی کو بتایا کہ صدر ٹرمپ تجاویز کے مسودے کی حتمی مںظوری دینا تھی لیکن جمعے کو وائٹ ہاؤس کے سچویشن روم میں ہونے والے اجلاس کے بعد بھی ان کی جانب سے کوئی فیصلہ سامنے نہیں آٰیا۔
