کامن ویلتھ گیمز 2026: ارشد ندیم جیولن تھرو کے فائنل راؤنڈ میں میڈل کے لیے قسمت آزمائیں گے
جمعہ 31 جولائی 2026 21:30
ارشد ندیم نے کوالیفائنگ راؤنڈ میں 78.63 میٹر کا جیولن تھرو پھینک کر فائنل راؤنڈ کے کے لیے کوالیفائی کیا تھا (فائل فوٹو: اے ایف پی)
کامن ویلتھ گیمز 2026 میں مینز جیولن تھرو کے فائنل راؤنڈ میں اتوار کو اولمپک گولڈ میڈلسٹ ارشد ندیم ان ایکشن ہوں گے۔
فائنل راؤنڈ میں ارشد ندیم پاکستانی وقت کے مطابق سنیچر کو صبح 12 بج کر 15 منٹ پر اپنا تھرو پھینکیں گے۔
ارشد ندیم نے اپنے پیغام فینز کو کہا ہے ’فائنل مقابلے میں تھرو پھینکوں گا، آپ سب دعاؤں میں یاد رکھیے گا۔‘
اس سے قبل جمعرات کو گلاسگو کے سکاٹسٹون سٹیڈیم میں ارشد ندیم نے کوالیفائنگ راؤنڈ میں 78.63 میٹر کا جیولن تھرو پھینک کر فائنل راؤنڈ کے کے لیے کوالیفائی کیا تھا۔
ارشد ندیم اگرچہ براہِ راست کوالیفکیشن کے لیے مقررہ 84 میٹر کی حد عبور نہ کر سکے تھے، تاہم مجموعی کارکردگی کی بنیاد پر ٹاپ 12 ایتھلیٹس میں شامل ہو کر وہ فائنل میں جگہ بنانے میں کامیاب رہے۔
کوالیفائنگ مرحلے میں سری لنکا کے رومیش پتھیراجے نے 82.84 میٹر کی بہترین تھرو کے ساتھ پہلی پوزیشن حاصل کی، جبکہ گریناڈا کے اینڈرسن پیٹرز 81.29 میٹر کے ساتھ دوسرے اور جنوبی افریقہ کے ڈاؤ سمتھ 80.64 میٹر کی تھرو کے ساتھ تیسرے نمبر پر رہے۔
ارشد ندیم کے روایتی حریف انڈیا سے تعلق رکھنے والے نیرج چوپڑا نے 79.61 میٹر کی تھرو کے ساتھ پانچویں پوزیشن حاصل کرتے ہوئے فائنل کے لیے کوالیفائی کیا۔ دونوں اولمپک چیمپئنز اب ایک بار پھر کامن ویلتھ گیمز کے فائنل میں آمنے سامنے ہوں گے، جہاں طلائی تمغے کے لیے سخت مقابلے کی توقع کی جا رہی ہے۔
پاکستان کی جانب سے محمد یاسر سلطان نے بھی کوالیفائنگ راؤنڈ میں شرکت کی تاہم وہ صرف 74.36 لمبی تھرو پھینک کر 14ویں نمبر پر رہے اور اگلے مرحلے کے لیے کوالیفائی نہ کر سکے۔
کوالیفائنگ مرحلے کے اختتام پر مجموعی طور پر 12 بہترین ایتھلیٹس نے فائنل میں جگہ بنائی۔
