نئے کرنسی نوٹس کا اجرا اور 10 روپے کا نوٹ بند ہونے کی افواہ، سٹیٹ بینک کیا کہتا ہے؟

سٹیٹ بینک آف پاکستان (ایس بی پی) نے جمعرات کو سوشل میڈیا پر گردش کرنے والی ان افواہوں کی تردید کردی ہے جن میں دعویٰ کیا گیا تھا کہ 10 روپے کا کرنسی نوٹ بند کیا جا رہا ہے یا اسے تبدیل کرانے کے لیے آخری تاریخ مقرر کردی گئی ہے۔

مرکزی بینک نے ایک بیان میں کہا کہ سوشل میڈیا پر 10 روپے کے نوٹ کی ممکنہ بندش اور اسے تبدیل کرانے کی آخری تاریخ سے متعلق گردش کرنے والی رپورٹس کو واضح طور پر مسترد کیا جاتا ہے۔

سٹیٹ بینک نے کہا کہ ’یہ رپورٹس بے بنیاد ہیں اور ان میں کوئی حقیقت نہیں۔‘

سٹیٹ بینک کے مطابق ’نئی کرنسی نوٹ سیریز کے اجرا کی تجویز وفاقی کابینہ کے زیر غور ہے۔‘

سٹیٹ بینک نے کہا کہ ’یہ معاملہ ابھی زیر غور ہے اور کسی بھی مالیت کے کرنسی نوٹ کو تبدیل کرنے یا بند کرنے سے متعلق کوئی فیصلہ نہیں کیا گیا۔‘

مرکزی بینک نے مزید کہا کہ ’اگر ایسا کوئی فیصلہ کیا گیا تو اس سے عوام کو سرکاری ذرائع کے ذریعے باضابطہ طور پر آگاہ کیا جائے گا اور اگر کسی کرنسی نوٹ کو بند کیا گیا تو اسے تبدیل کرانے کے لیے عوام کو مناسب وقت دیا جائے گا۔‘

سٹیٹ بینک نے عوام کو ہدایت کی کہ وہ کرنسی نوٹوں سے متعلق کسی بھی اطلاع کے لیے صرف ایس بی پی کی جانب سے جاری کردہ سرکاری اعلانات پر انحصار کریں۔

واضح رہے کہ 10 روپے کے نوٹ کی بندش سے متعلق افواہیں ایک ماہ قبل سینیٹ کی قائمہ کمیٹی برائے خزانہ کے اجلاس میں سٹیٹ بینک کی بریفنگ کے بعد سامنے آئیں۔

سینیٹ کی قائمہ کمیٹی برائے خزانہ کو بریفنگ دیتے ہوئے ڈپٹی گورنر سٹیٹ بینک ڈاکٹر عنایت حسین نے بتایا تھا کہ بڑھتی ہوئی پیداواری لاگت کے باعث 10 روپے کا کاغذی نوٹ ختم کرنے پر غور کیا جا رہا ہے اور اس کی جگہ 10 روپے کا سکہ جاری کیا جائے گا۔

انہوں نے بتایا تھا کہ نئے کرنسی نوٹوں کی سیریز میں 10 روپے کا نوٹ شامل نہیں ہوگا، جبکہ جدید سکیورٹی فیچرز کے ساتھ نئے نوٹ جاری کرنے کی تیاری کی جا رہی ہے۔