جنرل اسمبلی اجلاس، نائب وزیراعظم و وزیر خارجہ اسحاق ڈار نیویارک پہنچ گئے

پاکستان کے نائب وزیرِاعظم و وزیر خارجہ سینیٹر اسحاق ڈار اقوام متحدہ کی جنرل اسمبلی کے اجلاس میں شرکت کے لیے نیویارک پہنچ گئے ہیں۔

پیر کو وزارت خارجہ کی جانب سے جاری کیے گئے بیان میں بتایا گیا ہے کہ اقوام متحدہ میں پاکستان کے مستقل مندوب عاصم افتخار احمد، امریکہ میں پاکستان کے سفیر رضوان سعید شیخ اور نیویارک کے قونصل جنرل عامر احمد آتوزئی کے علاوہ اقوام متحدہ میں پاکستان کے مشن اور قونصلیٹ کے دیگر افسران نے ان کا استقبال کیا۔

نائب وزیرِاعظم و وزیر خارجہ اسحاق ڈار اپنے دورے کے دوران اعلیٰ سطح ملاقاتوں کے علاوہ اعلیٰ سطح اجلاسوں میں بھی شرکت کریں گے جہاں وہ پاکستان کے لیے اہمیت کے حامل ایشوز پر پاکستان کا موقف پیش کریں گے جبکہ اقوام متحدہ کے ایجنڈے پر دو طرفہ، علاقائی اور عالمی امور کے حوالے سے پاکستان کی ترجیحات بھی سامنے رکھیں گے۔

بیان کے مطابق اس دوران وہ مختلف ایونٹس کے موقع پر وزیرِاعظم کے ہمراہ رہیں گے اور اقوام متحدہ کی جنرل اسمبلی کے ساتھ مختلف ممالک کے ہم منصبوں کے ساتھ ملاقاتیں بھی کریں گے جبکہ اجلاس سے متعلق دوسری مصروفیات کا بھی حصہ رہیں گے۔