منشیات کیس: کامیڈین بھارتی سنگھ کے بعد شوہر بھی گرفتار

معروف انڈین کامیڈین بھارتی سنگھ کو گذشتہ روز منشیات رکھنے کے الزام میں گرفتار کرنے بعد ان کے شوہر ہرش لمبا چھیا کو بھی حراست میں لے لیا گیا ہے۔

انڈین نیوز چینل این ڈی ٹی وی کے مطابق نارکوٹکس کنڑول بیورو نے ہرش لمبا چھیا کو 15 گھنٹے پوچھ گچھ کرنے کے بعد اتوار کو منشیات رکھنے اور استعمال کرنے کے الزام میں گرفتار کیا گیا ہے۔

نارکوٹکس کنڑول بیورو کا کہنا ہے کہ ان کے گھر سے 86.5 گرام حشیش برآمد ہوئی ہے۔

سنیچر کو نارکوٹکس کنڑول بیورو نے کامیڈین سٹار بھارتی سنگھ کو گھر سے منشیات برآمد ہونے کے بعد گرفتار کیا تھا۔

یہ گرفتاری اس تفتیش کا حصہ ہے جس کا آغاز اداکار سشانت سنگھ راجپوت کی خودکشی کے بعد بالی وڈ میں مبینہ منشیات کے استعمال پر شروع ہوا تھا۔

رواں مہینے اداکار ارجن رام پال کے گھر کی بھی تلاشی لی گئی۔ ارجن رام پال اور ان کی گرل فرینڈ گیبرئیلا کو پوچھ گچھ کے لیے طلب کیا گیا تھا۔

گیبرئیلا سے تقریباً 12 گھنٹوں تک جبکہ ارجن رام پال سے چھ گھنٹوں کی تفتیش ہوئی۔

ارجن رام پال نے کہا تھا کہ ان کے گھر سے جو دوا ملی تھی وہ ان کو تجویز کی گئی تھی۔

انہوں نے کہا کہ وہ تحقیقات میں تعاون کر رہے ہیں۔

نارکوٹکس کنٹرول بیورو نے ایک آسٹریلوی آرکیٹیکٹ پال بارٹر کو منشیات فراہمی کے سلسلے میں حراست میں لیا تھا۔

جنوبی افریقہ کے ایک شہری کو گرفتار کیے جانے کے بعد اس آسٹریلوی شہری کا نام مبینہ منشیات سپلائر کے طور پر سامنے آیا تھا۔

واضح رہے کہ منشیات رکھنے اور استعمال کرنے کے کیس میں نارکوٹکس کنٹرول بیورو نے معروف اداکاروں کو بھی طلب کیا تھا۔