’بس اب بہت ہو گیا‘ شکست پر سرینا ولیمز آبدیدہ ہوگئیں

آسٹریلین اوپن کے سیمی فائنل مرحلے میں امریکی ٹینس سٹار سرینا ولیمز نومی اوساکا کے ہاتھوں شکست کے بعد ہونے والی نیوز کانفرنس کے دوران آبدیدہ ہو گئیں اور پریس کانفرنس ادھوری چھوڑ کر چلی گئیں۔

فرانسیسی خبر رساں ادارے اے ایف پی کے مطابق سرینا ولیمز کے 24 ویں گرینڈ سلیم ٹائٹل جیتنے کی خواہش کو نومی اوسکا نے انہیں شکست دے کر پورا نہ ہونے دیا۔ ہارنے والی سرینا ولیمز کے لیے نیوز کانفرنس کے موقع پر جذباتی ہونے کی وجہ سے راڈ لیور ایرینا میں موجود ہجوم کو بھاری دل سے الوادع کہنا پڑا۔

نیوز کانفرنس کے دوران سرینا ولیمز کے آبدیدہ ہونے کی ویڈیو سوشل میڈیا پر زیر بحث ہے، سرینا ولیمز کے مداحوں کا  کہنا ہے کہ ’نیوز کانفرنس کے دوران ان سے ایسے سوال نہیں پوچھنا چاہیے تھے جن سے وہ جذباتی ہو گئیں۔‘

ٹوئٹر صارف جے نے لکھا کہ ’مجھے بہت برا لگا کہ کھیل کے بعد پوچھے گئے سوالوں نے سرینا کو رلا دیا انہیں اکیلا چھوڑ دینا چاہیے تھا۔‘

ٹوئٹر صارف میڈیسن نے لکھا کہ ’مجھے سرینا پر بہت فخر ہے، انہوں نے بہت اچھا کھیل پیش کیا لیکن نومی پر بھی فخر کیا جانا چاہیے۔‘

23 بار گرینڈ سلیم جیتنے والی سرینا ولیمز نے اعتراف کیا کہ ’میں نے بہت ساری غلطیاں کیں۔‘

اپنی پرفارمنس کے حوالے سے مزید بات کرتے ہوئے انہوں نے کہا کہ ’یہ وہ مواقع تھے جہاں میں جیت سکتی تھی، میں 5-0 سے آگے بڑھ سکتی تھی میرے لیے یہ ایک بہت بڑی غلطی کا دن تھا۔‘

کھیل کے دوران ہونے والی غلطیوں کے دباؤ کی وجہ سے نیوز کانفرنس کے دوران سرینا ولمیز آبدیدہ ہوگئیں جب انہوں نے رپورٹرز کو بتایا کہ ’مجھے نہیں معلوم کہ میں باہر ہو گئی ہوں۔‘

نیوز کانفرنس کے بعد انسٹاگرام پر میلبرن اور آسٹریلیا سے تعلق رکھنے والے مداحوں سے مخاظب ہوتے ہوئے سرینا ولیمز نے کہا کہ ’آج کا نیتجہ اور کارکردگی مثالی نہیں تھی لیکن ایسا ہوتا ہے۔ مجھے فخر ہے کہ میں آپ سب کے سامنے کھیل سکی اور آپ کی حوصلہ افزائی کی وجہ سے میں آپ سب کے لیے بہتر کام کرنا چاہوں گی‘۔