Sorry, you need to enable JavaScript to visit this website.

کشیدگی میں کمی چاہتے ہیں: امریکی صدر کا اسرائیلی وزیراعظم کو فون

غزہ سے اسرائیل پر پھینکے گئے راکٹوں کی زد میں آ کر اب تک 12 ہلاکتیں ہوئی ہیں۔ فوٹو: اے ایف پی
امریکی صدر جو بائیڈن نے اسرائیلی وزیراعظم بنیامین نتن یاہو پر زور دیا ہے کہ وہ کشیدگی کو کم کرتے ہوئے غزہ تنازع میں جنگ بندی کی طرف آئیں۔
خبر رساں ادارے روئٹرز کے مطابق وائٹ ہاؤس کے ترجمان نے بدھ کو بتایا کہ امریکی صدر نے اسرائیلی وزیراعظم کو ٹیلی فونک رابطے میں کشیدگی کم کرنے کے لیے کہا ہے۔
اسرائیل کے وزیراعظم نے اس سے قبل کہا تھا کہ وہ جنگ بندی کے لیے وقت کا تعین کر سکتے ہیں۔

 

اسرائیل کی فضائیہ نے فلسطین پر حملے جاری رکھے ہوئے ہیں جبکہ غزہ میں برسراقتدار حماس کے عسکریت پسندوں نے سرحد پار راکٹ فائر کرنے کا نیا سلسلہ شروع کیا ہے۔
مصر کی سکیورٹی فورس نے کہا ہے کہ دونوں فریق ثالثوں کی مدد سے اصولی طور پر جنگ بندی پر راضی ہو گئے ہیں، تاہم اس کی تفصیلات ابھی طے کی جا رہی ہیں اور مذاکرات کو ناکامی سے بچانے کے لیے خفیہ رکھا جا رہا ہے، اس لیے کسی ڈیل سے انکار کیا جاتا ہے۔
فلسطین کے محکمہ صحت کے حکام نے کہا ہے کہ ’دس مئی کو لڑائی شروع ہونے کے بعد سے اب تک فضائی حملوں میں 223 افراد ہلاک ہو چکے ہیں۔ بمباری سے سڑکیں، عمارتیں اور دیگر انفراسٹرکچر تباہ ہوا ہے، جو پہلے سے انسانی بحران کے شکار غزہ میں حالات کو تباہ کن موڑ پر لے آیا ہے۔‘
اسرائیلی حکام کے مطابق ’اسرائیل میں راکٹ حملوں کے نتیجے میں 12 ہلاکتیں ہوئی ہیں جبکہ اس دوران بھگدڑ مچتی ہے اور شہری جان بچانے کے لیے محفوظ پناہ گاہوں بھاگتے ہیں۔‘

اسرائیلی فضائیہ کی بمباری سے غزہ میں کئی عمارتیں ملبے کا ڈھیر بن چکی ہیں (فوٹو: اے ایف پی)

جنگ بندی کے لیے مقامی اور امریکی سفارتی کوششوں میں تیزی دیکھی گئی ہے تاہم یہ ابھی تک کامیاب نہیں ہو سکیں۔
اسرائیل کے وزیراعظم نتن یاہو نے امریکی سپورٹ کو سراہا ہے اور ان کے مطابق ’اسرائیل کے سب سے بڑے اتحادی نے یقین دلایا ہے کہ غزہ سے راکٹ حملوں کے خلاف اس کو اپنے دفاع کو حق حاصل ہے۔‘
تاہم ٹیلی فونک رابطے میں امریکی صدر بائیڈن نے نتن یاہو سے کہا کہ ’وقت آ گیا ہے کہ تنازع کی شدت کو کم کرنے کے لیے اسرائیل کشیدگی میں کمی لائے، جس میں دونوں اطراف سے عام شہریوں کی ہلاکتیں ہوئی ہیں۔‘
وائٹ ہاؤس ترجمان کے مطابق 'دونوں رہنماؤں نے غزہ میں رونما ہونے والے واقعات پر تفصیلی گفتگو کی، حماس اور دیگر دہشت گرد عناصر کی صلاحیتوں کو کم کرنے میں اسرائیلی پیشرفت اور امریکی و علاقائی حکومتوں کی سفارتی کوشش پر بھی بات کی گئی۔'
ترجمان کے مطابق صدر بائیڈن نے وزیراعظم نتن یاہو سے کہا کہ ان کو توقع ہے کہ آج کشیدگی کم کرنے کی جانب واضح پیش رفت ہوگی جو جنگ بندی کے راستے کی طرف جائے گی۔
اسرائیل کی جانب سے وائٹ ہاؤس کے اس بیان پر ابھی تک کوئی تبصرہ نہیں کیا گیا۔

شیئر: