Sorry, you need to enable JavaScript to visit this website.

ایمریٹس کی پاکستان سمیت چار ممالک پر پابندی میں توسیع

پاکستان کے علاوہ انڈٰیا، بنگلہ دیش اور سری لنکا سے جانے والی پروازوں پر پابندی بھی بڑھائی گئی ہے (فوٹو: اے ایف پی)
متحدہ عرب امارات کی سب سے بڑی ایئرلائن ایمریٹس نے پاکستان، انڈیا، بنگلہ دیش اور سری لنکا پر سفری پابندی کو 7 اگست تک بڑھا دیا ہے۔
عرب نیوز کے مطابق ایمریٹس کی جانب سے کہا گیا ہے کہ ’یہ اقدام حکومت کے احکامات کی روشنی میں اٹھایا گیا ہے۔‘
متحدہ عرب امارات میں 15 لاکھ پاکستانی رہتے ہیں اور سعودی عرب کے ساتھ ساتھ یہاں سے بھی کثیر تعداد میں ترسیلات زر پاکستان بھجوائی جاتی ہیں۔
امارات سے پاکستان جانے والی پروازوں کا سلسلہ کورونا وائرس کی وجہ سے مہینوں تک متاثر رہا ہے، جبکہ پابندی کی تاریخوں میں بھی کئی بار توسیع کی گئی ہے۔
ایئرلائن کی جانب سے ویب سائٹ پر جاری بیان میں کہا گیا ہے کہ ’یو اے ای حکومت کی ہدایات کے مطابق انڈیا، بنگلہ دیش، پاکستان اور سری لنکا سے آنے والے مسافروں کے لیے پابندی 7 اگست 2021 تک بڑھا دی گئی ہے۔‘
بیان میں مزید کہا گیا ہے کہ ’ایسے مسافر جنہوں نے 14 روز کے دوران پاکستان، انڈیا، بنگلہ دیش اور سری لنکا کا سفر کیا ہو، وہ یو اے ای  کے کسی بھی علاقے کا سفر نہیں کر سکیں گے۔‘
ایئرلائن نے یہ وضاحت بھی کی ہے کہ ’یو اے ای کے باشندے، گولڈن ویزہ رکھنے والے اور سفارت کار، جو کورونا کے پروٹوکول کے معیار پر پورے اترتے ہوں، وہ ان پابندیوں سے مستثنیٰ ہوں گے۔‘

ایئرلائن نے مسافروں سے کہا ہے کہ ’وہ اپنے ٹکٹس سنبھال کر رکھیں اور جب پروازیں بحال ہو جائیں گی تو رابطہ کریں‘ (فوٹو: ایمریٹس ٹوئٹر)

اس کی جانب سے مسافروں کو یہ ہدایت بھی کی گئی ہے کہ اگر ان کی پرواز منسوخ ہو گئی ہے یا پھر کورونا کی وجہ سے عائد کی جانے والی پابندیوں کی زد میں آگئی ہے تو انہیں دوبارہ سے بکنگ کے لیے جلدی فون کرنے کی ضرورت نہیں۔
ایئرلائن کے مطابق ’آپ اپنے ٹکٹس سنبھال کر رکھیں اور جب پروازیں بحال ہو جائیں گی تو رابطہ کریں۔‘
خیال رہے کہ سنیچر کو ایمریٹس ایئرلائن کی جانب سے ان ممالک کے لیے پروازوں کی پابندی 28 جولائی تک بڑھانے کا اعلان کیا گیا تھا جس کی تاریخ میں جمعرات کو 7 اگست تک توسیع کردی گئی ہے۔

شیئر: