Sorry, you need to enable JavaScript to visit this website.

’وہی ہوا جس کا ڈر تھا‘، جمائمہ گولڈسمتھ کے بیٹوں کے جعلی ٹوئٹر اکاؤنٹس

عمران خان کے مخالفین طنز کے لیے ان کے بیٹوں کا ذکر کرتے ہیں (فوٹو: سوشل میڈیا)
عمران خان کی سابق اہلیہ جمائما گولڈسمتھ نے ٹوئٹر پر اپنے بیٹوں سے منسوب اکاؤنٹس کی تردید کرتے ہوئے کہا ہے کہ ’یہ اکاؤنٹس پاکستان میں سیاسی ایجنڈے کے لیے جعل سازوں نے بنائے ہیں۔‘
جمائما گولڈ سمتھ سے ایک ٹوئٹر صارف نے اُن کے بیٹوں سلیمان خان اور قاسم خان کے اکاؤنٹس کی تصویر شیئر کرتے ہوئے پوچھا کہ ’کیا یہ آپ کے بچوں کے اصل اکاؤنٹس ہیں؟‘
جمائما گولڈسمتھ کے بیٹوں سے منسوب اکاؤنٹس میں ڈسپلے پکچر پر دونوں کی عمران خان کے ساتھ تصاویر اور اُن کی حمایت میں ٹویٹس موجود ہیں۔ سلیمان خان کے بائیو میں لکھا ہے کہ ’لڑو! جب تک تم کامیاب ہو جاؤ۔‘
جمائما گولڈسمتھ نے ری ٹویٹ کرتے ہوئے لکھا کہ ’شکریہ ایلون مسک۔ خود کو میرے بچے ظاہر کرنے والے جعلی اکاؤنٹس جو پاکستان میں سیاسی ایجنڈے کے لیے جعل سازوں نے بنائے ہیں۔ جب آپ نے بلیوٹک ہٹائے تھے تو مجھے جو ڈر تھا کہ ایسا ہو گا اور وہی ہوا۔ آپ کی اطلاع کے لیے عرض ہے کہ میرے بچے سوشل میڈیا پر نہیں ہیں اور نہ ہی ان کا کوئی ارادہ ہے۔‘
جمائما گولڈ سمتھ کو عمران خان سے رشتہ توڑے کئی برس گزر چکے ہیں لیکن مخالفین طنز کے لیے ان کے بیٹوں کا ذکر کرتے ہیں۔
پاکستان مسلم لیگ ن کی نائب صدر مریم نواز شریف اور جمائما گولڈ سمتھ کے درمیان ٹوئٹر پر نوک جھونک بھی ہوئی تھی۔
گذشتہ سال پاکستان کے زیر انتظام کشمیر میں الیکشن مہم کے دوران مریم نواز نے عمران خان کی جانب سے ان کے بیٹے پر کی گئی تنقید کا جواب دیتے ہوئے کہا تھا کہ ’عمران خان کے بچے یہودیوں کی گود میں پلے ہیں۔‘
رواں سال اپریل میں مسلم لیگ ن کے رہنما عابد شیر علی نے ایک ٹویٹ کے ذریعے کارکنان سے اپیل کی تھی کہ وہ جمائما گولڈ سٹتھ کے گھر کے باہر احتجاج کریں۔ انہوں نے لکھا تھا کہ وہ عمران خان کے بچوں کو بتانا چاہتے ہیں کہ ان کے والد کیسے ہیں۔
ان کی اس ٹویٹ کے جواب میں جمائما نے لکھا تھا کہ ان کے گھر کے باہر مظاہرے کیے جا رہے ہیں، ان کے بچوں کو نشانہ بنایا جا رہا ہے۔
یاد رہے کہ جمائما گولڈ سمتھ برطانیہ کے ایک ارب پتی تاجر کی بیٹی ہیں۔ انھوں نے 1995 میں عمران خان سے شادی کی۔ ان کے دو بیٹے سلیمان خان اور قاسم خان ہیں۔ یہ شادی نو سال تک چلی اور سال 2004 میں دونوں میں طلاق ہو گئی۔

شیئر: