ٹی20 ورلڈ کپ کوالیفائر: منگولیا کی ٹیم 10 رنز پر ڈھیر، سنگاپور نے پہلے اوور میں میچ جیت لیا

ٹی20 کرکٹ میں تاریخ رقم کرتے ہوئے سنگاپور نے منگولیا کی ٹیم کو 10 رنز پر آل آؤٹ کر دیا ہے۔ 

جمعرات کو ملیشیا کے شہر بانگی میں ہونے والے ٹی20 ورلڈ کپ ایشیا کوالیفائر اے میں منگولیا اور سنگاپور مدمقابل تھے۔ 

میچ کے آغاز میں سنگاپور نے ٹاس جیت کر منگولیا کو پہلے بیٹنگ کی دعوت دی مگر منگولیا کی ٹیم 10 رنز کے مجموعی سکور پر ڈھیر ہو گئی اور سنگاپور کو 20 اوورز میں جیت کے لیے 11 رنز کا ہدف دیا۔

ای ایس پی این کرک انفو کے مطابق یہ ٹی20 کرکٹ کی تاریخ کا سب سے کم ٹوٹل ہے جو جس کا تعاقب سنگاپور نے پہلے اوور کی پانچ بالز پر ہی کرلیا۔

سنگاپور کے ہرشا بھردواج چار اوورز میں 3 رنز دے کر 6 وکٹیں حاصل کر کے نمایاں رہے۔ منگولیا کے پانچ بیٹرز صفر پر ہی پولین لوٹے۔ 

منگولیا نے دس اوورز تک بیٹنگ کی، جن میں تین اوورز میڈن گئے۔ منگولین ٹیم کی صرف چوتھی اور آخری وکٹ کی پارٹنرشپ 11 گیندوں تک چل سکی۔

11 رنز کے تعاقب میں سنگاپور کے راؤل شرما نے اپنی پہلی گیند پر چھکا لگایا اور ولیم سمپسن نے پہلے اوور کی آخری گیند پر چوکا لگا کر میچ سنگاپور کے نام کیا۔

واضح رہے ٹی20 ورلڈ کپ ایشیا کوالیفائر اے میں منگولیا اپنے چاروں میچ ہار کر پوائنٹس ٹیبل پر آخری پوزیشن پر ہے۔