شہزادی مشاعل بنت فیصل السعود ایشین یوگاسنا سپورٹ فیڈریشن کے بورڈ میں شامل

ایشیائی یوگاسنا سپورٹ فیڈریشن نے مملکت کی نمائندگی کرنے والی شہزادی مشاعل بنت فیصل آل سعود کو تنظیم کے بورڈ میں شامل کرنے کا اعلان کیا ہے۔

عرب نیوز کے مطابق اے وائی ایس ایف کی جانب سے جاری اعلامیے میں بتایا گیا ہے کہ ’شہزادی مشاعل فیڈریشن میں خواتین اور بچوں کے تحفظ کی کمیٹی کی سربراہی بھی کریں گی۔‘

دبئی میں حال ہی میں منعقد ہونے والی ایشیائی یوگاسنا سپورٹ فیڈریشن کے چھٹے جنرل اجلاس میں اس تقرری کی متفقہ طور پر منظوری دی گئی ہے۔ 

سعودی یوگا کمیٹی کی نائب صدر شہزادی مشاعل خواتین اور نوجوانوں کو بااختیار بنانے اور مختلف کھیلوں کے مقابلوں میں کھلاڑیوں کے لیے حفاظتی اقدامات یقینی بنانے میں اہم کردار ادا کر رہی ہیں۔

شہزادی مشاعل کی اس منصب پر تقرری خواتین کی کھیلوں میں شمولیت بڑھانے، خواتین اور بچوں کے تحفظ کے لیے اقدامات کو فروغ دینے اور ایشیا میں یوگاسنا اور روایتی کھیلوں کی ترقی کی حمایت کے لیے اہم اقدام ہے۔

شہزادی مشاعل خود بھی ہتھا یوگا، اشتانگا ونیاسا یوگا، ہمالیائی روایت کی مراقبہ اور یوگا تھراپی میں 15 سال سے زیادہ کا تجربہ رکھتی ہیں۔

ایشیائی یوگاسنا سپورٹ فیڈریشن کے ساتھ مل کر شہزادی مشاعل نے 2022 میں تربیت حاصل کی اور اس کے ساتھ ہی یوگا فیڈریشن کے انتظام اور یوگاسنا نظام میں بھی مہارت حاصل کی۔

شہزادی مشاعل بنت فیصل یوگا سے متعلق مختلف قسم کی مشقوں اور کھیلوں میں خواتین اور نوجوانوں کی حمایت کرتی ہیں اور کھیلوں کی غیر سرکاری تنظیم کی مالک اور منتظم ہیں اور عرب سائیکلنگ فیڈریشن کی خواتین کی کمیٹی کی سربراہ بھی ہیں۔