صومالیہ میں ترقی و استحکام کےلیے بین الاقوامی سپورٹ اہم: سعودی نائب وزیرخارجہ

سعودی نائب وزیرخارجہ انجینئر ولید الخریجی نے قطر کے دارالحکومت دوحہ میں صومالیہ سے متعلق او آئی سی کے رابطہ گروپ کے اجلاس میں شرکت کی ہے۔

سعودی خبررساں ایجنسی ’ایس پی اے‘ کے مطابق انجینئر ولید الخریجی نے اپنے خطاب میں صومالی عوام کے لیے ترقی، استحکام اور سلامتی کے لیے مزید بین الاقوامی تعاون کو فعال کرنے کی اہمیت پرزور دیا اور ترقیاتی و طویل المدتی منصوبوں کی اہمیت کو اجاگر کیا۔

سعودی نائب وزیر خارجہ نے مزید کہا’ مملکت کی جانب سے شاہ سلمان ریلیف سینٹر کے ذریعے امدادی اور انسانی بنیادوں پر فلاحی امور کی انجام دہی جاری رکھے گا جو ہمارے صومالی بھائیوں کی مدد اور ترقیاتی امور کو بہتر بنانے اور انسانی مشکلات کے خاتمے میں معاون ہیں۔‘

انہوں نے ترکیہ میں ہونے والے صومالیہ اور ایتھوپیا کے مابین مفاہمتی معاہدے کا خیرمقدم کرتے ہوئے اسے دونوں ممالک کے مابین امن کی بنیاد پر ترقی و استحکام کے نئے دور کا آغاز قرار دیا۔

انجینئر ولید الخریجی نے مملکت کی جانب سے استحکام کو نقصان پہنچانے اور قومی یکجہتی کو غیرمستحکم کرنے کےلیے ہونے والے حملوں کی شدید مذمت کرتے ہوئے انتہا پسندی سے نمٹنے کےلیے اجتماعی کوششوں کی اہمیت پر بھی زور دیا۔

انہوں نے ان حملوں کو ملکی وحدت و پائیدارترقی کے لیے نقصان دہ قرار دیا۔

انہوں نے برادر ملک صومالیہ کو اقوام متحدہ کی سلامتی کونسل کی دو سالہ غیرمستقل رکنیت کے حصول کو بھی سراہتے ہوئے اسے صومالیہ کے لیے عالمی طورپر مثبت اقدام قرار دیا۔